Nongpoh Jylliew 05: Kawei ka longiing haka shnong Pahamrioh Them hynne ka step phyrngap kala hap ban mad ïa kawei ka jingjia kaba sngewsih hadien ba ka ding kaba shyrkhei kala klang bad bamduh ïaka iingsah jong ki haduh ba baroh ki jingdon jingem bad ki tiar ki tar kila kylla dpei lut.
Kane ka jingjia ka la jia hynne ka step phyrngap ha ka por 3:20 baje ei ei, ha kaba ka ïing jong ka Kong Isila Kshiar ka la kem ding kynsan naka bynta jong ka iingshetja bad ka daw kaba kem ding katei ka ïing ym shym la lah ban tip.
Naka liang ka kmie haba ïathuh ïa katei ka jingjia kala la ong ba baroh ki jingdon jingem jong ka iing kila julor bad kylla dpei lut bad ka dei ka jingduhnong kaba khraw kumba katei ka iing ka dei ruh kaba dang shu dep shna bad ha katei ka por kam shym la don ha iing hynrei ka leit ban ban sah haka jaka bylla jong ka bad don tang uwei u khun shynrang u ba don jingduna haka dkhot met bad u ba dang thiah lyngngai ha kawei ka kamra thiah hynrei u la ioh ban mih noh na katei ka jaka hadien ba ka ding kala klang.
Ha katei ka jingjia naka liang ki paidbah nongshong shnong kila pyrshang ruh ban ïarap pynlip ïaka ding hynrei namar ka jingklang jong ki thylliej ding kim shym la lah ban leh eiei tad haduh ban da poi ka kali pynlip ding, hynrei baroh ki jingdon jingem kila ingkhong khaid bad kylla dpei lut.
Na ka liang u Secretary Shnong, u Bah Donroy Kshiar u la pynpaw ka jingsngewsih halor kane ka jingjia ba sngewsih bad kum ka shnong ruh ka la pyrshang ban ai jingiarap bad na ka daw ba ka ding ka la pur kylleng ka ïing kim lah shuh ban leh ei ei bad kum ka shnong kala rai ruh ban pynshna biang ïa katei ka iing naka bynta katei ka longkmie.
Shuh shuh u la kyrpad ruh ïaki bor ba dei peit naduh ki nongmihkhmat ba kin phai khmat lem ban ïarap ïa katei ka longiing kaba mad ïaka jingeh kaba khraw namar baroh ki jingdon jingem kila ingkhong lut wat tang ka jaiñ ban phong ruh kim don shuh.
MAR ÏA DEP SHNA, BAMDUH KA DING ÏAKA IING HAKA SHNONG PAHAMRIOH THEM
