Nongpoh, Risaw 27: Ki bor pulit ka Nongpoh lyngba ka traffic branch mynta ka sngi u Blei ki la bteng ban bat ia kiba bun ki Kali ar shaka, kaba dei halor ka nongrim ba kim bud satia ia ki kyndon ain (Traffic rules), ha kba kane ka wan rah jingma bad ka buh jingma ruh ki paidbah.
Na ka liang ki Pulit ka Nongpoh Traffic Branch mynta ka sngi ki la pynlong ruh ia ka jingbat ia kiba bun ki Kali ar shaka ha sor Nongpoh, halor ka nongrim ba ki pynkhein ain khlem da bud ia ki kyndon ain.
Ha kane ka jingbat ia ki Kali Ar shaka ba pynkhein ain la ialam da u ophisar In-charge u Rubul Ali bad la don lang kiwei kiwei ki pulit kiba la bat ia bun tylli ki Kali ar shaka kiba iaid lyngba kane ka surok bah ha sor Nongpoh.
Kane ka jingbat ia kitei ki Kali ar shaka, ka long ban tehpyrkhing ba ki dei ban deng ia ki helmet bad ki dei ruh ban pynbiang ia ki kot ki sla kiba dei katkum ki kyndon jong ka ain.
Haba kren sha ki lad pathai khubor u Ophisar in-charge ka Nongpoh Traffic Branch, u Rubul Ali, u la ong ba kane ka jingbat ia kine ki kali ar shaka kam dei satia ba ki pynthud ia ka leit ka wan jong ki, hynrei ka dei ka jingtehlakam ba ki hap ban bud ia ki kyndon da kaba deng ia ki Helmet bad ban don ki kot ki sla, namar ka jingleh mon khlem da bud ia ki kyndon ain niah kali ka ju wan rah ia ki jingjia ba sngewsih na ka por sha ka por.
Shuh shuh, u la kyntu ruh ia ki paidbah ban shngain ki paidbah ne ki nongniah kali, la ka dei ka kali ar shaka ne kiwei ruh ki dei ban bud ia ki kyndon ain bad lada ki paidbah ki ai ia ka jingiatrei lang ban bud ryntih ia ki kyndon kane ka iarap shibun ban pynduna ia ki jingiatyngkhuh kali bad ruh ban lait na kino kino ki jingjia ba sngewsih kaba la ju jia tang na ka daw kaba ki niah khlem akor ne khlem da bun ia ki kyndon ain niah kali, u la bynrap.
