U Rodrigo Hernández Cascante na Spain, uba la tip kum u Rodri bad uba lehkai kum u rangialehkai pdeng na ka Manchester City ha ka English Premier League, u la khur ia ka khusnam Ballon d’Or 2024, katba ha ki kynthei la khur da ka Aitana Bonmati, ka thei ialehkai na Spain bad kaba lehkai na ka klob kynthei ka FC Barcelona.
Ia katei ka lympung bah ha ka ban jied ia ki rang bad thei ialehkai phutbol ba tbit, la pynlong ha Theatre du Chatelet ha Nongbah Paris ka ri France, ha kaba la jied ia u rang bad ka thei ialehkai phutbol ba tbit, da ka jingdon ki nongpyniaid jong ki klob bad ki kapten na ki klob bapher bapher, kumjuh ruh ki nongpyniaid ia ka phutbol ha France.
Ha ka jingiajied hapdeng ki nongpyniaid klob bad ki kapten, ki la ibit ban jied ia u Rodri ba un khur ia katei ka khusnam Ballon d’Or 2024 ne kum u rangialehkai ba kynsai, katba ha ki kynthei pat ki la jied ia ka Aitana Bonmati.
U Rodri, u la khur ia katei ka khusnam, ka dei hadien ba u la lah ban ialehkai bha eh na bynta ka Manchester City, kaba la pynlong syndon ia ka Manchester City ba kan khur ia ka namjop ha ka English Premier League jong ka samoi 2023/2024 bad kumjuh ruh uba la don bynta ha ka kynhun ialehkai ka Spain ha ka Euro 2024, kaba la pynlong syndon ia ka Spain ba kan khur ia ka namlahduh, hadien ba ka la pynliem ia ka England da 2-1.
