Ka 3rd Annual Sports Meet ia kaba la pynlong da ka ‘Jingiaseng Samla Nongrim District’, ka la poi noh sha kaba kut hynnin ka sngi Saitjain ha madan Umkremdykhong, ia kaba la iashimbynta shitrhem da ki samla ka Balang Presbyterian kiba hap hapoh ka Nongrim District.
Haba pynkut noh ia katei ka 3rd Annual Sports Meet, la sakhi da ka jingdon u Bah Sosthenes Sohtun, MLA Jirang, nangta ki Pastor kiba kynthup ia u Pastor B.D Kurbah, ki Tymmen Basan, ki Rangbah Balang, ki nongialam ka ‘Jingiaseng Samla Nongrim District’ lem bad kiwei.
U Bah Sosthenes Sohtun, haba ai jingkren ha katei ka sngi, u la ai ka jingkhublei ia ki nongialam ka ‘Jingiaseng Samla Nongrim District’, kiba la lah ban pyntyllun beit ha ka ban pynlong ia katei ka Annual Sports Meet, kaba long ruh kum kawei na kaba wanrah jingiaieid bad ka jingiatylli hapdeng ki para samla, khlem da khein ne thew ia ki kynhun niam bapher bapher.
Shuh shuh, u la ong ruh, ba ka jinglah ban pynlong ia kiba kum kitei ki lympung ialehkai, kan iarap ruh ia ki khun samla, ba kin lait na shibun ki kam sniew bad ki jingdih ba pynbuaid kiba la kynrei eh ha kine ki sngi ba mynta.
Namarkata, na ka liang u MLA u la ai ka jingkhublei kitbok kitrwiang ia ka ‘Jingiaseng Samla Nongrim District’, ba kan nangiaid ha ki kam babha jong ki, kata nalor ka kam ba ki pynleit jingmut ha ki kam shakri Blei bad ruh na bynta ban wanrah ia ka bha ka miat ha ka shnong ka thaw bad ha katei ka thain hi baroh kawei.
