Ka NorthEast United Football Club ka la kiew sha ka kyrdan ba san ha ka miej iakhein poin ka Indian Super League bad katei ka jingkiew ka NorthEast United sha ka kyrdan ba san, ka dei hadien ba ka la lah ban pynliem da 3-2 pyrshah ia ka Odisha FC ha ka jingiakhun mynta ka janmiet ha Indira Gandhi Athletic Stadium, Guwahati.
Ka jingiakhun ba mynta ka janmiet hapdeng ka NorthEast United pyrshah ia ka Odisha FC, ka long ba tang ha ka kylla step jong ka jingiakhun, ka NorthEast United ka la lah ban tam da 2 kol, ia kaba la thep da u A. Ajaraie, uba la thep kol ha ka minit ba 12 bad minit ba 40.
Haba bteng ka kylla miet jong ka jingiakhun, ki rangialehkai ka Odisha FC ki la pyrshang ban pynphai kylla ia kitei ki kol ba ki la shah thep ha ka NorthEast United bad ha kaba kum katei ka por, ki la ioh pynphai shikol ha ka minit ba 60 ia kaba la thep da u H. Boumous, hynrei ha ka minit ba 71 ka NorthEast United ka la ioh biang ban thep kol ia kaba la thep da u Guilermo bad ha ka minit ba 80 ka Odisha FC ka la ioh biang ban thep da u D. Mauricio, hynrei hadien kata kim shym la ioh shuh ban thep kol, kaba la pynlong ia ki ba kin hap pdiang ia ka namrem kaba 3-2 hakhmat ka NorthEast United.
Ha kawei pat ka jingiakhun mynta ka janmiet, kaba la long hapdeng ka Mumbai City pyrshah ia ka Kerala Blasters, kaba la long ha Mumbai Football Arena Stadium, ka Mumbai City ka la lah ban pynliem noh ia ka Kerala Blasters da 4-2.
Kumba ka long mynta, ha ka miej iakhein poin ka ISL, ka Bengaluru ka don hakhlieh duh da kaba khur 16 poin na 7 sien iakhun, bud sa ka Mohun Bagan kaba ioh 13 poin na 6 sien iakhun, ka Punjab FC bad Jamshedpur mar 12 poin bad ka NorthEast United 11 poin na ki 7 sien iakhun. Ha kane ka samoi ialehkai ba mynta samoi, lehse kan dei u nem sniew na bynta ka East Bengal, namar kat haduh mynta na ki 6 sien iakhun, kam pat khur namjop ne iakhaid wat tang shisien ruh, ha kaba ka la shu mad tang ia ki namrem ba lynter khaid.
