Ki nongialam ka HYC Ri Bhoi Sepngi, mynta ka sngi ki laleit ban kynduh ia u EE PWD Nongpoh Division bad kata ka long ban dawa na u ba u dei ban shimkhia bad peitngor halor ka jingdon bun ki trok kit khia bad kiba ju pyndonkam lyngba ka surok na Umrit bad mih sha Pahammawlein 20mer.
Ka nongrim kaba la pynlong ia kitei ki nongialam ka HYC Ri Bhoi Sepngi, kiba kynthup ia u Bah R.C Thangkhiew, President bad u Bah P. Kharsyntiew, General Secretary ba kin shimkhia ia katei ka mat, ka dei hadien ba ki la iohi bad lap ba ka surok na Umrit sha Pahammawlein 20mer, ka la sdang sniew watla dei kaba dang shu dep shna bad nalorkata, kaba ki sngewkhia eh ka dei halor ka jingkieng Lailad, ka jingkieng kaba la rim bad kaba la shah tang ban iaid ki kali kiba kit hapoh 9 ton.
Kitei ki nongialam ka HYC, ki la ong ba kumba ki paidbah ki la mad ia ka jingsniew surok kaba tasam ha kine ki snem kiba la leit noh, hynrei naduh ba la ioh ia ka surok bha, ka la pynsuk shisha ia ka leit ka wan ki paidbah, pynban kumba ka long mynta na ka jingiaid ki trok kitkhia, kiba ju iaid ha ki por miet, ka pynsiew ia ka surok bad kaba kham ma eh ka dei ia ka jingkieng Lailad, kaba dei ruh ka jingkieng kaba donkam tam eh na bynta ki paidbah kiba sah ha Ri Bhoi Sepngi.
Namarkata, haba iadei bad katei ka jingkynduh ia u EE PWD, kitei ki nongialam ka HYC ki la kyntu ia u ban shimkhia bad nalorkata ki la kyntu ruh ia u DC Ri Bhoi bad kumjuh ruh ia u SDO ka Patharkhmah Civil Sub-Division ba kin shimkhia eh halor katei ka mat, khnang ba katei ka surok kan neh slem bad khamtam eh halor ka jingkieng ha Lailad.
