Nongpoh, Naiwieng 14: Kum shi bynta ban pynthikna ia ka jingpyntreibha ia ki skhim bapher bapher kiba lah dep ban pyntrei da ka tnad Urban Affairs ha ki shnong ki thaw kiba hap hapoh ka sor Nongpoh, u MLA ka Nongpoh konsttwensi, u Bah Mayralborn Syiem mynta ka sngi u la pynlong ia ka jingleit jurip dalade markhmat ha ryngkat ka jingdon lang jongki ophisar ka tnad Urban Affairs lem bad ki nongialam shnong.
Kum ban shu kdew, na ka liang ka tnad Urban Affairs, ka la dep ban pyntrei ia shibun tylli ki skhim ha ki shnong ki thaw jong ka sor Nongpoh ba kynthup naduh ki footpath, ki motorable road, retaining walls lem bad kiwei kiwei de naduh u snem 2018 ter ter haduh u snem 2023 lyngba ka skhim Infrastructure Development (ID) bad ha kane ka sngi la jurip ia kine ki skhim kiba la dep ban pyntrei ha ka shnong Mawdiangum, Pahamsyiem bad Nongpoh.
Haba kren sha ki lad pathai khubor, u Bah Mayralborn Syiem u la pynpaw ia ka jingsngewkmen ban iohi ba ia kine ki skhim la pyntreikam bha bad ai ruh ka jingiaroh ia ki ophisar bad nongtrei jong ka tnad Urban Affairs, ki nongialam shnong bad ruh ia ki kontraktor kiba don ka bynta kaba khraw ban pyntreikam bha ia kine ki skhim jong ka sorkar na ka bynta ka jingmyntoi jong ki paidbah.
Shuh shuh, na ka liang u Bah Mayralborn Syiem, u la kyntu ruh ia ki paidbah nongshong shnong ba kin iai bteng ban ai ia ka jingiatreilang kaba pura khamtam bad ki nongialam ha ki por ki ban dang wan ruh kumjuh khamtam ha kaba iadei bad ka jingai kylluid ia ki jaka puta ki jongki ban pynheh bad pyniar ia ki surok shnong bad kiwei kiwei de ki kam pynroi khnang ba kan long ka jingmyntoi ia ki paidbah hi baroh.
