Nongpoh, Naiwieng 21: Ki nongialam ka Nongpoh Region Auto Owners & Drivers Association (NRAO&DA), mynta ka sngi ki la leit syndon ba ujor da ka jingthoh sha ka ophis u deputy commissioner ka Ri Bhoi bad ruh sha u ka ophis u Superintendent of Police ka Ri Bhoi, kaba dei halor ka jingkynnoh ba u Bah Marcus Marten bad u Bah W. Makri, kiba dei ki nongialam barim ka Nongpoh Region Auto Owners & Driver Association (NRAO&DA) ki la pyndonkam bakla ia ka kyrteng jong ka Association, kaba dei wat hadien ba la pynthymmai ia ki nongkitkam bad ki la ioh ka jingithuh na ka ophis u Deputy Commissioner ha ka jingialam jongki, kum kita ki nongialam ba thymmai katei ka Assocation.
Haba kren sha ki lad pathai khubor mynta ka sngi, u President kane ka seng u Bah Banasar Lyngdoh Nonglait bad u Education Secretary u Bah Elianby Tynsong, ki la ong ba ki la lap ia katei ka jingpyndonkam bakla kitei ki nongialam barim ia ka kyrteng ka Association, ka dei hadien ba ki la thmu ban pynlong ia ka jingialang da kaba kam ba kin jied thymmai ia ki nongialam ha ka 23 tarik u Naiwieng 2024 ha Madan Pahamsyiem.
Ki la kynnoh ruh ba u Bah Marcus Marten bad u Bah W Makri kim dei shuh ki nongialam kane ka Association bad kim don hok shuh ban kam ba ki dei ki nongialam, namar ia ki nongialam ba thymmai ka Association la dep ban pynthymmai bad ia kane ka Association ruh la dep ban pynthymmai ha kaba la ioh bor ne ithuh da ka ophis u Deputy Commissioner ne ki bor jong ka ain.
Kitei ki nongialam ki la ther tyngeh ruh halor kane ka jingpyndonkam bakla ia ka kyrteng ka Association bad ki la maham jur ruh ban leh syndon da kaba tyngeh. Ki la kynnoh ruh ba kane ka kam ka dei tang ka jngleh riewkhlaw u Bah Marcus Marten ban pynbiej ia kiwei ki nongniah Auto, kiba ym pat tip ba ka sorkar ne ka ophis u deputy commissioner ka la ithuh ia ki kum kita ki nongialam ba la ithuh da ka ain bad na ka ophis u Deputy Commissioner ha kaba ki don ia ki kot ki sla kiba biang ba la dep ban pynkupbor katkum ki kyndon jong ka ain.
Shuh shuh, kitei ki nongialam ki la pynpaw ruh baroh kine kiei kiei baroh ki jia, ka dei tang ka jingialam bakla u Bah Marcus Marten ban pynsngewthuh bakla ia kiwei bad ha ka jingshisha ka ka ophis u DC ka la ithuh ia ki kum ki nongialam kane ka Association ba ki la dep ban iaid katkum ki kyndon ba la buh da ka sorkar bad ha kawei ka bynta ki la maham tyngeh ba kim banse ban leit sha ka lynti ka ain lada u dang pyndonkam bakla ia ka kyteng ka Association, ki la bynrap.
