Nongpoh, Naiwieng 27: Ki nongialam ka Khasi Students Union (KSU), North Khasi Hills Eastern Border Area mynta ka sngi ki la leit syndon ban ia kynduh ia ka District Medical & Health Officer ka Ri Bhoi, na ka bynta ban buddien bad pan jingpynshai halor ka jingkynnoh ba iwei I khyllung ba dang 2 snem ka rta, I la khlad noh hadien ba la ai Injection ha CHC Bhoirymbong.
Ka seng KSU North Khasi Hills Eastern Border Area ka la leit ban kynduh ia ka DMHO ka Ri Bhoi, ka dei hadien ruh ba ki la wan kynduh ia katei ka longing bad ba la kynnoh ba itei I heprit ula khlad noh tang hadien ba la dep ban ai injection ha katei ka jaka ai jingsumar jong ka CHC Bhoirymbong.
Ha kane ka jingleit kynduh la ialam da u Samla Banjop Maring, President ka KSU North Khasi Hills Easter Boder Area bad la synran lang ruh da ka jingdon lang kiwei ki dkhot. Ha kane ka jingiakynduh ka seng ka la ai ruh da ka jingthoh sha ka DMHO ban dawa pynlong ia ka jingtohkit la katei ka jingkhlad itei I khyllung ka dei shisha na ka jingai injection ne na kiwei ki daw jong ka jingpang jingshitom.
Kumba la pynpaw da u Samla Banjop Maring, President ka KSU North Khasi Hills Eastern Border Area, u la ong ba ka jingthmu ban leit ia kynduh ia ka DMHO kam dei satia na kano kano ka daw, hynrei ban pan jingshai bad ruh ban phah tohkit halor katei ka jingjia, khnang ba kan nym wan rah ia ka jingtieng jingsyier ia kiwei pat ki paidbah bad ruh ban paw ka ia ka jingshisha halor katei ka jingjia jongka jingkhlad I khyllung ba la kynnoh ba ka dei na ka daw ka jingai injection.
Shuh shuh, u la pynpaw ruh ba ka seng ka la ioh ban ia kren bad ka DMHO bad kum ka seng ka la kyrpad ban pynlong ia ka jingtohkit kaba bniah khnang ba kiba bun ki paidbah kin ioh jingshai bad ruh ba ka jingdon ka jaka ai jingsumar ka sorkar ia ki paidbah kam dei ban long ka jingtieng jingsyier bad ka dei ban long kaba sngain bad kaba ai jingmyntoi ia ki paidbah.
Ha kawei ka bynta, u la iathuh ruh ba ka DMHO ka la iathuh ba ka phah ban pynlong ia ka jingtohkit halor katei ka jingjia bad ka seng ka kyrmen skhem ba ka ophis ka DMHO kan sa ai ka jingpynshai hadien ba la dep tohkit khnang ba kan long ka jingshai sha baroh ki paidbah, u la bynrap.
