New Delhi, Jylliew 06: Dang shen ki bor Indian Central Bank ne ka Reserve Bank of India (RBI) ka la wanrah noh ia ka ksiar kaba la kot kumba 100 tonnes kaba la buh hapoh ka ri London, kane ka sienjam ban wanrah noh ia ki ksiar kiba la buh ha kylleng ki ri ka pyrthei ka dei ka sienjam hadien u snem 1991.
Lah ban kdew bad katkum ka jingtip ba la iohlum, la iathuh, ba katto katne spah ne hajar ton ka ksiar jong ka Ri India la buh ha kylleng ki Ri ka Pyrthei kiba kynthup naduh ka Bank ba don ha ka ri England naduh ba ka ri India ka la ioh ia ka jingsynshar laitluid bad katto katne ton la wanrah biang sha India ha ki snem 1990 hadien ba la don ki jingjia kyrduh hapoh ka ri India.
Lah ban kdew ba ka ri London, ka dei kawei na ki ri ha ka pyrthei kaba don ia ka iew kaba heh ne riewspah ha ka ia die ia thied ksiar lane gold market bad ka dei ruh ka ri kaba la ioh ia ka jingithuh na ki Central Reserve Banks kylleng ka pyrthei ban buh shipor ia ka ksiar na kiwei ki ri ha London, hynrei mynta ka mih ka jingkylli balei pat ka ri India ka la wanrah biang noh ia ka ksiar ba la buh ha London kumba 100 ton sha ka Reserve Bank jong ka hi hapoh India bad haei yn buh bha kat ia kane ka ksiar? Hato ka dei ka rai ban iada ia ka ri India na kino kino ki jingjia kyrduh lashai la shisngi??.. Mih bun ki jingkylli.
Ka jubab halor ka jingkylli kaba nyngkong, ba balei la wanrah biang ka ksiar sha India, ka jubab ka long, ba kan bha ban buh ne sumar noh ia ka ksiar ba la buh sha kiwei pat ki ri namar ban iada na kino kino ki jingjia khie thma, ne kino kino ki jingjia kiba lah ban buh jingeh pat ha ka lawei ban wan ioh duh ei ia ka ksiar ba la buh sha kiwei pat ki ri bad ia kine ki ksiar yn buh ha ki jaka kiba don ka jingshngain ban buh ia ka (Security) ba la ithuh kyrpang da ka RBI.
WANRAH NOH KA RBI IA 100 TONNES KI KSIAR NA LONDON/ JINGKYLLI BALEI LA WANRAH BIANG IA KINE KI KSIAR SHA INDIA
