Nongstoin, K’lyngkot 10: U Bah Marbiangbor Nongsiej, u briew uba la shah pynduh Tiket jubor ha ki heh nongialam ka VPP bad kiba la ai noh ia ka Tiket sha u Bah Juristman Iawphniaw, u la pynbna ialade ba u la weng noh na ka jinglong kum u dkhot ka VPP bad halor kata, u la phah ruh ia ka shithi iehnoh kam sha u President bad Secretary ka VPP.
Ha ka kyrwoh kaba u la phah sha ki lad pathaikhubor, u Bah Marbiangbor Nongsiej, u la ong ba ka daw kaba la pynlong ia u ba u hap iehnoh ia ka jinglong kum u dkhot ka VPP, ka dei halor ki nongrim jong ka jingleh bad rai donbor bad ba u la shah pynduh jubor ia ka tiket wat hadien ba ka State Election Committee ka la dep jied hi bad pynbna ruh ia ka kyrteng jong u ba un long kum u Kyrtong ka VPP na Nongstoin Constituency.
