Shillong, K’lyngkot 13: Ka Shillong Lajong Football Club, ka la kiew syndon sha ka kyrdan ba 4 ha ka miej iakhien poin jong ka samoi ialehkai ka I-League bad kata ka dei hadien ba ka la lah ban pynliem kput sa ia ka Sporting Club Bengaluru, haba kaba ka la lah ban thep syndon da 5-0, ha ka jingiakhun kaba hynne ka janmiet ha Madan SSA Stadium, Shillong.
Lyngba ka namjop kaba mynta ka sngi, ka Shillong Lajong kaba don ha ka kyrdan ba 7, ka la kiew syndon sha ka kyrdan ba 4 bad kumba ka long mynta ka Shillong Lajong, ka la kiew sha ka kyrdan ba 4, kaba don 12 poin ha kti na ki 8 sien iakhun ha ka I-League bad ka jingiakhun kaba bud jong ka Shillong Lajong, kan dei pyrshah ia ka Sreenidi Deccan, ka kynhun kaba don ha ka kyrdan ba 10 ha ka miej iakhein poin bad ka jingiakhun kan long ha ka 25 tarik mynta u Bnai.
Haba phai ha ka jingiakhun kaba mynta ka sngi, ka Shillong Lajong FC ka la lah ban teh lakam ia ka jingiakhun, ha kaba tang ha ka kylla step, ka la ioh ban thep da 2 kol ia kaba la thep da u Daniel Gonçalves ha ka minit ba 40 bud sa ka kol lyngba u Figo Syndai ha ka minit ba 45+2 jong ka kylla step.
Haba bteng ka kylla miet, ka Shillong Lajong ka la nion tyngeh ia ka Sporting Club Bengaluru bad halor katei ka jingiakhun, u D. Tardin, u rangialehkai ka Shillong Lajong, u la lah syndon ban khur ia ka Hat-Trick da kaba thep haduh lai kol, ia kaba u la thep na ka minit ba 60, 67 bad ha ka minit ba 75.
