Shillong, K’lyngkot 22: Kum ka lad ban kyrshan ia ka Jaintia Hills Autonomous District Council (JHADC), mynta ka sngi na ka liang ka sorkar jylla ka la pynlait bad aiti ia ka song pisa kaba la kot kumba 40 klur tyngka kaba dei na bhah khajna kaba mih na u dewiong.
Ia kane ka song pisa, la aiti da u Myntri Rangbah ka jylla u Conrad K Sangma ha ki kti jong u Ma Thombor Shiwat, Chief Executive Member ka JHADC, ha kaba la sakhi lang ruh da u Bah Prestone Tynsong bad u Ma Sniawbhalang Dhar, ki Symbut Myntri Rangbah ka jylla.
Lah ban kdew, ba lyngba kane ka song pisa ba la bhah lypa na ka khajna na u dewiong, ka long kum ka jingkyrshan ia ka JHADC ban ioh pat ban siew ia ka tulop jong ki nongtrei kaba la sahkut kumba 12 bnai eiei.
Na ka liang, u Bah Thombor Shiwat, kum u CEM ka JHADC, u la pynpaw ia ka jingsngewnguh kaba khraw sha ka sorkar jylla kaba la pynmang da kane ka song pisa kaba kyrpang kaba long ruh ka jingkyrshan kaba radbah ha kaban pyntyllun ia ki kam jong ka Council khamtam ka jingsiew kaba sahkut na bynta ki nongtrei ka JHADC.
