Shillong, K’lyngkot 23: Kum ka jingiai bteng ban ia khun thma pyrshah na ka bynta ban pynduh jaid ia u drok, uba la pynjot ia bun ki khun samla ba lui lui hapoh ka jylla, u Myntri rangbah ka Jylla, u Conrad K. Sangma kum u kongsan u lam khmat ia ka High Level & District Level Drug Disposal Committee jong ka tnad pulit hapoh ka jylla ban pynjot ne thang noh ia ki Drok ba la ioh kurup bad ba la shongdor haduh T.53.86 klur ba la pynlong ha Star Cement Ltd.,Lumshnong, East Jaintia Hills District.
Ha kane ka prokram ka sorkar jylla ba la tip kum ka ‘Drug Disposal Programme’ jong ka sorkar jylla kaba ki la pynjot bad thang lut ia ki drok ba la ioh kurup, la don ryngkat ruh u symbut myntri ka sorkar jylla, u Bah Prestone Tynsong bad u Bah Sniawbhalang Dhar, ka myntri ka tnad ka koit ka khiah, ka Dr. Ampareen Lyngdoh, ka MLA ka Sutnga Saipung ka Kong Santa Mary Shylla, ka DGP ka tnad pulit ka jylla, Idashisha Nongrang bad kythup kiwei kiwei ki heh pulit ka jylla.
Haba kren ha kane ka sngi, u Myntri rangbah ka jylla, u la pynthikna biang ba ka sorkar jylla kan dang iai bteng ban ia khun thma pyrshah ia ka jingkynrei u drok bad kane ka jingkynrei u drok ka sorkar kan pynkut noh da ka jingiatrei ryngkat na baroh ki tnad sorkar, ha kaba ka jingkynrei u drok ka la pynjot ia bun ki khun samla jong ka jylla.
Shuh shuh, u la ong ruh ba ka sorkar jylla lyngba ka Drug Reduction, Elimination, & Action Mission (DREAM), ba ka la ia khun thma pyrshah ban pynduh jaid ia u drok bad ha kajuh ka por ruh kan ai ka jingkyrshan bad iarap kyrpang ia ki samla ba la ngop ha u dork, kaba dei hapdeng ka jingiakhun pyrshah jongki ban lait na ka jingkyrni ha u drok.
Ha kane ka jingpynjot ne thang noh ia u drok ba la ioh kurup ha ka jylla, ki kynthup ia u drok ba la ioh kurup na ki 5 tylli ki District bad ba la register case ha ka kyndon ka NDPS Act, kata na East Khasi Hills, West Khasi Hills, Ri Bhoi District, West Jaiñtia Hills bad East Jaiñtia Hills District.
