Umïam, K’lyngkot 28: Kawei na ka shlem ai jinghikai ba la tip kum ka College of Community Science, Central Agricultural University (Imphal), Tura, Meghalaya, lem bad ka jingiatrei lang ka ICAR-NINFET Kolkata, ICAR-CICR Nagpur, Deendayal Research Institute, bad ka ICAR-CRIJAF Barrackpore, ki la shim ia ka sienjam ban pynlong ia ka ‘National Symposium’ ba lai sngi kynthih, kaba dei halor ka phang “Threads of Heritage: Exploring Traditional Textiles and Natural Fibres” ba la sdang naduh ka 27 tarik bad kan kut ha ka 29 tarik u Kyllalyngkot 2025 ba la pynlong ha College of Post-Graduate Studies in Agricultural Sciences, Umïam, Ri-Bhoi District.
U Conrad Sangma, kum u Myntri Rangbah ka jylla Meghalaya, u la wan ban shim bynta kum u kongsan bad la sakhi lang ruh da ka jingdon lang ka Archana Chitnis, ka MLA na Madhya Pradesh, u Atul Jain, General Secretary ka Deendayal Research Institute, ka Dr. Jyoti Vastrad, Dean ka College of Community Science, CAU, Tura, u Dr. A. Mishra, Vice Chancellor ka CAU, Imphal, bad kynthup ruh ki nongthain jain bad ki nongshna kti na kylleng ki jylla shatei lam mihngi ka ri India.
Ha kane ka sngi, u Conrad Sangma, myntri rangbah ka jylla, u la plie paidbah ruh ïa ka Cultural & Textile Exhibitions, kaba long shi bynta ban pyni ba ki jylla shatei lam mihngi ka ri India ki long kiba riewspah ha ka jingpynmih ia ki jain bad ki tiar ba long tynrai ba la thain ne pynmih ha ki nonghsong shnong na ka jylla shatei lam mihngi ka ri India.
Lyngba jong kane ka sngi, la pynlait paidbah ruh ïa ka Souvenir bad ruh ïa ki kot, kiba ïa dei bad kane ka jingïalangbah ba la tip kum ka National Symposium.
Haba kren ha kane ka sngi, u Conrad K. Sangma u la ai jingiaroh halor ka jingpynlong ia kane ka National Symposium, kaba dei shi bynta ban ailad ia ki nongthain jain bad ki nongshna kti kiba trei ia ki kam bapher bapher, ba kin lah ban sei madan ia ki sap ba ki don bad kum kane ka rynsan ka long kaba donkam na ka bynta ban dang kyntiew ia ki sap ki phong bad ruh ba ngin dang pynkhlain ia ki kam tyrnai kiba lah ban pynmih na kane ka jylla.
Shuh shuh, u la ong ruh ka jingdon kum kane ka lympung kam dei satia ban ailad ia ki nongthain ne ki nongshna kti ha ki kam bapher bapher ba kin ioh ia ka lad ban kyntiew ia ka ioh ka kot bad kine ki kam kiba ki trei bad kiba long tynrai ka long ruh shi bynta ban pynriew sphah ia ki kam tynrai ban ithuh ha kylleng ki ri ka pyrthei.
