Nongpoh, K’lyngkot 29: San ngut ki kyrtong jong ka Voice of the People Party (VPP) ki la thep kyrteng mynta ka sngi ban iakhun ia ka election MDC sha ka ing dorbar thaw ain ka Khasi Hills Autonomous District Council (KHADC) kaba ki la thep kyrteng mynta ka sngi ha ka ophis u Deputy Commissioner ka Ri Bhoi District.
Ki kyrtong ki la thep kyrteng ha khmat ki Returning Officers ki kynthup ia u Bah Mathew Makdoh na kyrtong ka VPP na Nongpoh, Isynei Hinge na Umroi, Apkyrmen Lyngdoh Nonglait na Jirang, Banrikus Nongsteng na Umsning, bad Kynjohlang Rangtong na Mawhati.
Haba pyndep ia kane ka jingthep kyrteng, la wan synrang lang ruh ia kitei ki kyrtong ka VPP da ki nongialam bad ki nongkyrshan ka party VPP na kitei ki 5 tylli ki constituency.
Haba kren sha ki lad pathai khubor, u Mathew Makdoh, kyrtong VPP na Nongpoh, bad u Isynei Hinge, kyrtong VPP na Umroi, ki la ong ba ka thong ba hakhmat eh jong ki ban iakhun ia kane ka elekshon MDC ka long ban wanrah ia ka sain pyrthei kaba khuid bad ka synshar khadar kaba shai. Ki la pynpaw ruh ia ka jingkitkhlieh ban pynjan ia ka synshar khadar sha ki paidbah bad ban peit bniah ia ki jingdonkam jong ki constituency jong ki.
