Nongpoh, Lber 07: Haba iashimbynta ban iasnohktilang ban rakhe ia ka International Women’s Day ne ka sngi kyrpang jong ki kynthei, ki nongialam ka Meghalaya Asha Workers Union (MAWU), mynta ka sngi ki la rakhe ia katei ka sngi ha Kripa Senior Citizen Home ne ka jaka kaba ri ia ki tymmen kiba dei ki riew kynthei bad kaba don ha shnong Pyllun, Ri Bhoi.
Lyngba jong katei ka sngi, la sakhi da ka jingdon ka Kong Mirajune Myrsing, President ka MAWU, nangta ka Kong Victoria Wahlang ka nongseng ia ka Kripa Senior Citizen Home, ka Kong Wanshailang Wahlang, General Secretary ka MAWU, kiwei ki nongkitkam ka MAWU lem bad ki Mei-ieid kiba sah ha katei ka jaka kaba ri kyrpang tang ia ki riew tymmen.
Haba kren ha katei ka sngi, ba ki la pynlong ia katei ka jingrakhe ia ka International Women’s Day ha katei ka jaka, ka Kong Mirajune Myrsing, ka la ong ba ka nongrim kaba la pynlong ia ki ba leit rakhe ia ka International Women’s Day hapoh katei ka jaka, ka long kum shi bynta ban iasnohktilang lem bad ki Mei-ieid kiba don ha katei ka jaka.
Ha katei ka sngi, ba kitei ki nongialam ka MAWU, ki la leit ban rakhe ia katei ka sngi kyrpang jong ki kynthei hapoh katei ka jaka, la iohi ba ki Mei-ieid ki la iphuh mut phuh mat bad kiba la kmen eh, namar ki longkmie kiba don ha ka shatri ka MAWU, ki la leit shibun ban pynshngai ia kitei ki Mei-ieid.
Nalorkata, na ka liang ki nongialam ka MAWU, haba ki leit ha katei ka jaka, ki la leit ruh ban ai da ki jingai sngewbha ia ki Mei-ieid kiba shong ha katei ka jaka ba ri ia ki riew tymmen.
