Guwahati, Jylliew 7:
Ka jingjyllei jong u drok bad ka jingkhaïi beain ia u drok, i kumba kan nym kut shuh bad dang kynrei pynban kat dang mih ki sngi ki por. Wat lada ki bor pulit ka Assam hapoh ka jingialam jong u Himansta Biswa Sarma, ki la rai ban pynduh jait ia u drok, hynrei la iohi ba ki nongshalan beain ia une u jingdih uba la khang pyrshah kim salia ban leh beit ia kane ka kam watlada ka long kaba beain bad kaba la khang pyrshah da ka ain.
Kane ka jingnud kitei ki nongshalan beain, ka la paw pyrthei biang mynta, kata tang hadien ar sngi ba ki pulit ka Assam ki la ioh ban kurup haduh T. 16 klur u drok Heroin bad Yaba Tablets na Cachar bad Karbi Anglong. Mynta ka sngi pat ki pulit jongka Barpeta District kaba la lamkhmat da u Deputy Superintendent of Police, ka la ioh ban kurup haduh 50.72 gram u drok uba la song ha ki saw tylli ki synduk sabon na uwei u briew uba la tip kyrteng kum u Ramej Uddin Sikdar, 27 snem ka rta uba dei na ka shnong Dattakuchi Kajir Mill jong ka Barpeta District, Assam.
Halor kane ka jingjia, na ka liang ki pulit ka Barpeta District ki la pyn ngat kyndon ia utei utei u Ramej Uddin Sikdar hapoh ka ain NDPS bad ka jingtohkit halor kane ka jingjia kan dang iaid shakhmat ban lapdien shuh shuh ia kiwei pat kiba donkti ban leh ia kum kine ki kam beain.
