Nongpoh, Iaïong 09: Kum kawei na ka thong ban pynsuk ia ki paidbah bad ban don ka jingiajan ha ka jingioh jingmyntoi na ki kam shakri ka sorkar, ka ophis u Deputy Commissioner ka Ri Bhoi ka la pyntip ba ka la ai bor ia ki Block Development Officer jong baroh ki block bad kiba dei ruh ki Magistrate ban ai ia ka order na ka bynta ki birth bad death certificate sha kito kiba donkam hapoh ka District.
Haba ia kren sha ki lad pathai khubor, u Deputy Commissioner ka Ri Bhoi, u Abhilash Baranwal, u la ong ba ka daw kaba la pynkup bor ia ki Magistrate ne BDO ha man ka Block ban ai ia ka order ka long ban pynsuk ia ki paidbah ba kim donka shuh ban wan shaduh sha Nongpoh bad tang na ka Block kin ioh ia ka order lyngba ki Magistrate ba kin lah pat ban leit sha ki PHC ne CHC ban ioh ia ki birth ne death certificate hadien ba ki la ioh ia ka order.
U la iathuh ruh ba la pynkup bor ne ai bor ia ki BDO kiba dei ruh ki Magistrate ban leh ia kane ka kam ka long ban pynsuk ia ki paidbah ha kaba ia dei bad ki Birth bad Death Certificate, kaba long katkum ka jingpynkupbor na ka Registration of Births and Deaths Act, 1969 (Central Act No.18 of 1960) and the Meghalaya Registration of Births and Deaths rules, 1999.
Shuh shuh, u la bynrap ruh ki paidbah ka bor synshar District ka leh ia kane ka kam ban pynsuk ia ki paidbah, ka dei namar ba bun ki paidbah tang ban ioh ia ka birth bad death certificate ki hap ban wan shaduh sha Nongpoh bad da ka jingdon ki Magistrate ha ki Block, kiba dei ki BDO kan iarap shibun ban nym pynlut ia ka por bad ruh ban pynduna ia ka jinglut jingsep ba bun ki shnong nongkyndong lada ym ioh na ka ophis ki Block ki hap ban wan shaduh sha ka ophis treikam jong u ha Nongpoh, u la bynrap.
