Nongpoh, Ïaïong 16: Ka tnad wildlife mynta ka sngi ki la sdang ban pynkhuid noh ïaka met jong u Hati u ba la khlad hynnin ka sngi naka daw ka jingsuba ba shah bat ha ka bording ilektrik kaba khlain bor bha bad haba pynkhuid ïa ka met une u Hati la don lang u Dr. Duwaki Ryngad, Assistant Prof. ka St.Edmund College ha ryngkat ka jing ïadon lang u DFO ka wildlife u Sachin Gavade bad u Bah Leening Wahlang RFO ba dei peit ïaka Ribhoi District.
Haba pynkhuid ïa ka met jong une u Hati la shu thang noh ïa ka met jong u, da kaba tih da ka thliew bad sa thang, ha kaba la leh ruh katkum ki kyndon jong ka Wildlife Protection Act.
Kum ban pynkynmaw, ïa ka met une Hati la lap da ki paidbah nongshong shnong ka Kamurkuchi, Byrnihat hynnin ka sngi, ha kaba la pyntip sha ka tnad Wildlife kiba la wan ban tohkit bad mynta ka sngi la thang noh ïa ka met jong une u Hati.
Haba kren sha ki lad pathai khubor, u DFO ka tnad Wildlife, u Sachin Gavade, u la ïathuh ba mynta ka sngi la thang noh ïa ka met jong u Hati ba la ïap bad la leh ruh katkum ki kyndon jong ka Wildlife Protection Act, ha kaba kin pynthikna ban pyndep ïa kane ka jingthang khnang ban lait na ka jingshim kabu ki riew sniew kiba lah ban khlong ne ot ïa ka bniah lada shu tep ha khyndew.
U la ong ruh la thang noh ïa u Hati ruh hadien ba la dep leh ïa ka postmortem da ki doctor na ka tnad veterinary, ha kaba ïa mynta kim pat lah ban ai ïa ka kaiphod, hyrnei la suba ba kane ka jingïap u Hati ka lah ban dei na ka jingshah bat ha ka bording ilektrik.
Shuh shuh, u la pynshai ruh ba une u hati u lah ban dei u Hati uba wan shang da ka kynhun, hynrei u ngat noh ha kane ka jingshah bat ha ka bording ilektrik. U la bynrap ruh ban lait na kum kine ki jingjia ba sngewsih ïa ki mrad na ka liang ka tnad Wildlife kan ïa kren sani ïa ka tnad MeECL ban peit bniah ïa ki sainar ba don jingma khnang ba kum kane ka jingjia kan nym jia shuh kaba buh jingma ruh ym tang ïa ki mrad bad wat ïa ki paidbah nongleit nongwan sha ki khlaw ki btap.
