Nongpoh, Iaïong 17: Ka St. Alfred Secondary School, Marngar mynta ka sngi ka la ioh ban rah noh ia ka nam lahduh kum kawei na ka skul kaba la ioh ban khur bun ka jingjop ha ka lympung ialehkai sport ba la pynlong da ka ophis u District Sport Officer ka Ri Bhoi ba la tip kum ka District Level Inter School Athletic Meet 2025 ba la pynlong ha Madan Pahamsyiem Nongpoh.
Kane ka St. Alfred Secondary School Margar ka la ioh ban rah ia ka nam lahduh hadien ba ka la iohi ban khur haduh 9 tylli ki Troohy ba kynthup naduh ka best team, Best Athlete haki kyrdan bapher bapherbad ki Takma naduh ka sngi ba la sdang ïa kane ka lympung bad ba la pynhap pyrda noh mynta ka sngi.
Ia kane ka lympung ialehkai sport ki kynnah skul ka Ri Bhoi la wan ban pynhap pyrda da u Deputy Commissioner ka Ri Bhoi, u Abhilash Baranwal kum u kongsan bad u Additional SP ka Ri Bhoi, u Naman Kumar kum u symbut kongsan. Kiwei kiba la ia don lang ki kynthup ia ka Kong KB Jyrwa District School Education Ophisar, Ribhoi, u Bah Bobby L Nongbet, District Sports Officer, ki principal, ki nonghikai bad ki khynnah skul lem bad ki paidbah kiba la wan ban sakhi ha kaba pynkut noh ia kane ka lympung ialehkai spot ki khynnah skul ka Ri Bho.
Kum ban pynkynmaw, ha kane ka lympung la wan shim bynta haduh 36 tylli ki skul na ki dong bad ki thain ka Ri Bhoi District bad ki don haduh 901 ngut ki khynnah kynthei bad shynrang kiba la shim bynta ha ki jingialehkai sport bapher bapher, hynrei ha kine ki 3 sngi kynthih ka St. Aflred ka la ibit ban rah ia ka nam lahduh hadien ba ka la ioh ban khur bun ka jingjop.
Haba pynkut noh ia kane ka lympung la sam ruh ia ki khusnam sha ki nongjop naduh ki takma bad ki trophy bad ryngkat ki syrnod ha kaba ka St. Alfred Sec. School ka la ioh ban khur iaka nam lahduh hadien ba ka la khur ïa shibun tylli ki khusnam naduh ka Best Team haka kyrdan Under 14 jong ki kynthei , Under 16 jong ki kynthei bad Under 18 jong ki shynrang bad kynthei.
Kiwei kiwei ki skul kiba ioh ban rah iaka best team kynthup iaka MEECL Sec. School haka Under 14 ki shynrang, ka St. Judes Sec. School under 16 ki shynrang, bad la sam ruh iaki khusnam sha ki rang bad kithei kiba khur iaka nam kum kita Nongïalehkai kiba kynsai tam ha katei ka lympung.
Lyngba jong kane ka sngi, ka ophis u District Sports Ophisar ka la pyntip ruh ba ki Nongjop ha kane ka lympung kin sa ïoh ïaka lad ban pyntriem shuh shuh ïalade ha kine ki sngi ki ban sa wan bad ban pynkhreh kham bha shuh shuh naka bynta ka State Level Inter school Athletic meet 2025 ka ban sa long ha Nongbah Shillong.
