Nongpoh, Iaïong 21: Ka Federation of Khasi Jaintia and Garo People (FKJGP) North Khasi Hills District (NKHD) mynta ka sngi ka la plie pyrda noh ia ka lympung ialehkai phutbol ba al tip kum ka ‘Inter-Circle Football Knock-out Tournament’ ba la pynlong ha Madan Pahamsyiem.
Ia kane ka tournament la wan ban plie da u Bah Regional Thabah, Assistant General Secretary ka FKJGP kum u kongssan bad u Bah Arkinfield Khonglam, Sports Secretary ka FKJGP kum u symbut kongsan ha ryngkat ka jingdon lang u Bah Lui Star Lyngdoh, President ka FKJGP North Khasi Hills District bad ryngkat kiwei kiwei ki nongialam bad ki dkhot ka seng.
Kumba la pynpaw da kitei ki nongialam ka FKJGP, ka jingangnud ka seng ban pynlong ia kane ka tournament ka long shi bynta ban wan rah ia ka mynsiem jong ka jingiatylli hapdeng ki para nongialam na ki Circle bapher bapher kiba don ha Ri Bhoi District bad ruh ban don lang kata ka mynsiem ia trei lang na ka bynta ban dang pynkhlain ia ka jingshakri ia ki paidbah ka them Ri Bhoi.
Ha kane ka sngi sdang jong ka tournament la ia khun pyrshah ruh hapdeng ka Umden Circle pyrshah ia ka Bhoirymbong Circle, ha kaba ka Umden Circle ka la la ioh rah ia ka nam jop ha kane ka sngi plie ia ka tournament da kaba ka pynrem noh ia ka Bhoirymbong Circle da 2-0.
