Nongpoh, Iaïong 23: Ka Dorbar Raid jong ka Raid Marngar ba hap ha ka Hima Mylliem mynta ka sngi ka la pyndep ia kawei na ka lehniam ba la tip kum ka Lehniam Pomblang ha Ïewmawlong, Nongpoh na ka bynta ban kyrpad kyrpon ia U Blei Nongbuh Nongthaw ba un ri un sumar ia ki khun ki hajar bad kumjuh ruh ki nongwan iew wan hat bad ruh ban biang ka khaii ka pateng, ka rep ka riang, ryngkat ruh ban biang ki kam ki jam jong ki khun ki hajar hapoh ka Raid.
Ia kane ka lehniam Pom Blang ka Raid Marngar la don ryngkat u ruh Paiem Ainam Syiem, u Syiem ka Hima Mylliem, u Paiem Richard Syiem, Syiem ka Raid Marngar, ki longsan mansan ka Raid, u Basan Nongkseh, u Basan Nongumlong naka Hima Mylliem kiba long kita ki nongpeit nongkhmih ia ka Raid Marngar.
Kum ka jingpyntip paidbah, kane ka lehniam pomblang ka dei ka lehniam kaba ki pyndonakm da uwei u Blang balieh, u Syiar ryngkuh ba saw bad ka syiar iong kawei, ha kaba ki kur binong bishon ki dei ban synñiang katkum ka jingdonkam ban lehñiam lehrukom. La iathuh ruh ba ki nongpyndep ka kñia ka khriam ki long uwei naka kur Syiem bad uwei naka kur Damlong bad ki jingdonkam baroh ka dei ban pynbit pynbiang na iingsad iingsunon da ka Syiemsad kum u klong u skaw, u khaw u kpu rew bala dung ni bha bad u tola um sla kait, ka waitlam ban pom ïaka Blang bad ot ïaka syiar.
Haba pynpaw halor kane ka jingthmu kane ka lehniam Pomblang, u Paiem Richard Syiem u la pynshai ba kane ka lehniam pom blang ka dei ka lehniam ba ki pyndep ha ka sngi ba long iew kata hakhmat u mawñiam mawrukom ba don hakhmat ka iing Dorbar jong ka ïew. La ong ruh ba ia ki mawbynna bad ki mawñiam mawrukom ba don ha katei ka ïewe ka dei ka jingkitkhlieh u Syiem bad ka Dorbar Raid ha kaba ki hap ban sumar sukher man la u snem na ka bynta ban pyndep ïaka lehñiam lehrukom bad ia ka kñia ka khriam.
Shuh shuh, la pynshai ruh ba ka rukom knia ha kane ka lehniam pom blang ka dei hadien ba la dep kyrpad kyrpon ïa u Blei Nongbuh Nongthaw, uta u u sohsla jong ka Kur Syiem nyngkong un shim ïa u syiar ryngkuh ban ot na na ryndang bad pynjaw snam ha duwan dupat bad bun sa u sangot Raid naka kur Damlong un shim ïaka syiar iong bad ot kumjuh bad bud sa u Sohsla ka Kur Syiem uba pom ïa ka Blang na ryndang haduh ban da dkut thui. Hadien kitei ki jinglehniam kin sa wad ia ka daw jong ki syiar bad ka blang ban tip ba kane ka lehniam ka long kaba iaid beit iaid ryntih. Nalor kata hadien katei ka lehniam ki don ruh ka jingshad mastieh ban lehkmen bad ainguh aidem ïa u Blei Nongbuh nongthaw ha kaba ha kane ka lehniam ki kyynthie kim dei satia ban shim bynta bad lait noh tang kito kiba ba shu wan ban sakhi ha kane ka lehniam Pom Blang.
Ha kane ka sngi, u Paiem Ainam Syiem, u Syiem ka Hima Mylliem kum u Syiem u kmie u la ai ka jingkyrkhu kyrdoh ia ki khun ki hajar hapoh kane ka Raid bad khamtam ia kane ka lehniam ba kan kup kan urlong ba u Blei Nongbuh Nongthaw un sngap un sngew ia ka duwai ka phirat ba ki khun ki hajar kin bha ki mait bad ruh naduh ka rep ka riang ka trei ka ktah ba kan long bha kan man bha.
