Nongpoh, Jymmang 14: Naduh ki khynah skul, ki nonghikai bad ki bor pyniaid skul ka Alpha English Higher Secondary School, Nongpoh, ki la pynpaw ia ka mynsiem jong ka jingsngewkmen ba mynta ka sngi la lah ban plie paidbah noh ia ka Madan ialehkai Basketball ba ki la tei ha katei ka skul lyngba ka jingiarap u MLA ka Nongpoh u Bah Mayral Born Syiem lyngba ka skhim SRWP ha ka jinglut kaba la kot sha ka T. 5 lak.
Ia kane ka basketball court la plie da u Bah Mayral Born MLA ka Nongpoh kum u kongsan ha ryngkat ka jingdon lang ka L. Marak, kaba dei ka JRDO ka Umling C&RD Block, ka Kong W.K Blah, Principal, u Pr. Dr. K.B Kharbteng, Vice Principal lem bad ki nonghikai bad ki khynnah skul.
Ha kane ka sngi, nalor ka jingplie paidbah ia ka Basketball Court ka Skul ka la pynkup burom ruh ia ki khynnah skul kiba la pass bha ha ka SSLC bad HSSLC, ba ka skul ka pynpaw ia ka jingsarong halor ka jingwan rah nam rah burom kaba ki la pas bha ha kitei ki examination.
Haba ai jingkren ruh ha kane ka sngi, u MLA ka Nongpoh u Bah Mayral Born Syiem u la ai ka jingiaroh ia ki bor pyniaid jong Alpha English Higher Secondary School, kaba dei kawei na ka skul kaba la dang iaid shaphrang ban ai jingnang jingstad kaba paka ia ki samla pule.
U la ai burom ruh ia ki khynnah skul kiba la leh bha ha ka SSLC bad HSSLC ha kaba da ka jingtrei minot bad len lade ki la pas bha ha ka jingpule bad kane hi ka long ka nam bad ka burom ia ka ing ka sem, ka skul bad wat ia ka imlang ka sahlang.
Ha kaba ia dei bad katei ka Basketball Court ba la plie paidbah, u Bah Mayral Born Syiem u la aiti sha ki bor pyniaid skul bad kyntu ruh ba kin sumar bha na ka bynta ka jingmyntoi ki khynnah pule ha ka kam ialehkai Basketball, ba kane ka skul ka ju pynmih ruh ia ki samla ba don sap ha ki kam ialehkai sport.
