Shillong, Jymmang 15: U Myntri Rangbah ka jylla Meghalaya u Conrad K Sangma, mynta ka 15 tarik Jymmang, u leit ban plie ia u mawnongrim ban tei ia ka Indigenous Cultural Centre ba la mang na bynta ka Seng Khasi Kmie ha Mawkhar, Shillong, East Khasi Hills.
Ha kane ka sngi sah jingkynmaw la ia sakhilang ruh da u Symbut Myntri Rangbah u Bah Prestone Tynsong, u Myntri ka Tnad Art and Culture Bah Paul Lyngdoh, ki nongialam shnong bad ki nongialam ka Seng Khasi.
Lah ban kdew ba ka jingtei ia kane ka Cultural Centre la mang ha ka jinglut kaban kot kumba 15 Crore, ia kaba la kular da u Myntri Rangbah ka jylla ia ki nongialam ka Seng Khasi kmie, da kaba buh ia ka thong ban ri kyndong, ban pynneh pynsah bad ban pyninam ia ka riti dustur, ka kolshor, ka lehniah leh rukom bad kiwei kiwei.
“Kane ka building kan nym dei tang ka jingtei hynrei kan long ka jingtei ia ka jingiaid lynti jong ki jinglong tynrai, ka jaka ba kan don ka jingithuh ia ka riti dustur, ka lehniam leh rukom, ka jingngeit ban pashat na kawei ka pateng sha kawei pat”, ong u Myntri Rangbah ka jylla.
U la ong ruh, ba da ki hajar tylli ki snem, bun spah tylli ki jingngeit niam tynrai, ki jinglehniam la pynlong tang ha ki jaka kiba khlem da don ia kita ki jingtei kiba paka ne ka jaka kaba shongkun, kumta ngi la shimkhia mynta ban pynbit pynbiang na bynta ka jingdonkam ban pynpaw ia kita ki jinglong tynrai jong ki briew jong ngi.
U la ong ruh, ba ki jaidbynriew riewlum jong ngi ha kane ka thaiñ Shatei lam mihngi (North East) ka long kaba kham pher na kiwei pat, hynrei ngin pat lah ban buh jingthoh halor ki history, ki jingngeit bad ki jinglong tynrai, kumta na ka liang ka Chief Minister Research Fellowship (CMRF), ka sorkar jylla kan kyntiew ia ki kam pule wad bniah khnang ba ki jinglong tynrai bad ka history jong ngi kan neh kan sah.
Naduh u snem 2018, na ka liang ka sorkar ka la pyrshang ban thaw ki lad ki lynti kumno ban kyrshan, ban iarap kyntiew, ban pynneh pynsah bad ban rakhe ia ka jinglong riewspah jong ngi ia ka jinglong tynrai, la ka dei ha ka put ka tem na ki lum jong ngi, ka ktien jong ki mynbarim ne ka jinglong tynrai, ka kolshor kaba pynithuh ia ngi kum ki riewlum sha ka pyrthei hi baroh kawei.
