Nongpoh, Jymmang 15: Ka ophis u Executive Engineer ka tnad PHE Nongpoh Division mynta ka sngi u la buh syndon da ka jingkyrpad kaba jur ia ki paidbah kiba tuh ia ka um na u Pipeline ba pynpoi um sha ka sor Nongpoh, ba kane ka ka wan rah ia ka jingkyrduh umbam umdih ha ki shnong ba hap ha sor Nongpoh.
Kane ka jingkyrpad utei u ophisar ia ki paidbah kiba tuh um na ki Pipeline ka dei hadien ba ki la lap ba don ki briew kiba la tuh um da kaba pynpei ia u pipeline ban tan um sha la ïing na katei ka Tyllong umbam ka sor Nongpoh ba tan na Nongthymmai ba hap ha ka wah Umran ban poi shaduh ka Treatment Plant ka tnad PHE kaba don ha Iewmawlong.
Haba kren sha ki lad pathai khubor, u Bah U. Kurbah, EE ka tnad PHE Nongpoh Division, u la ong ba kane ka jingtuh um na ki Pipeline ka la jia na ka por sha ka por bad na ka liang ka tnad PHE ka la ju leit pynduh noh khnang ba ka um kan poi lut sha katei ka Treatment Plant kaba don ha Iewmalwong kaba kin sa pynpoi um pat sha ki shnong ba hap ha ka sor Nongpoh.
U la ong ruh ba kane ka jingtuh um na kitei ki Pipeline kam dei ka um kaba la khuid ban dih ban bam namar ym shym la lah ban pynkhuid kumba long ha ka Treatment Plant bad nalor kata, kane ka jingtuh um ka ktah ruh ia ki Pipeline ba kin sa duh noh bad ka pynduna ruh ban poi ka um sha ka Treatment Plant.
“Kane ka jingtuh da kaba pynpei ia u pipe ban tan um ka lah ban buh jingma ruh ia ki paidbah, namar ka lah ban don ka jingbthei ki Piple ba ka um kaba la tan ka khlain bad da kaba pynpei kan jur ka lyer kaba lah ban btei bad buh jingma jingmynsaw” ong u Bah Kurbah.
Namarkata, na ka liang ka ophis ka buh da ka jingkyrpad kaba sngewrit ia kino kino kiba don kti ban pynpei ia u pipe um ban tan um, ba ki dei ban sangeh ne law noh bad na ka liang ka ophis ruh kan dang pynlong ia ka jingleit peit leit khmih bad lada lap kin loit bad pynduh beit ia ka jingtan um ba kane ka ktah shisha ia ka jingwan poi ka um sha ka treatment plant kaba don ha Iewmawlong Nongpoh, u la bynrap.
