Shillong, Jymmang 16: U Lat ka jylla, u CH Vijayashankar mynta kas ngi u la pynkup burom ia ki samla kiba wan shakhmat tam ha ka SSLC bad HSSLC examination 2025 hapoh ka jylla ba la pynlong ha Nongbah Shillong.
Ha kane ka sngi u Lat ka jylla u la ioh lad ruh ban ia twad jingmut na kine ki samla pule bad ha kajuh ka por u la aiti ia ki syrnod bad ki jingai sngewbha sha kine ki samla kiba wan hakhmat eh ha ka SSLC bad HSSLC examination 2025.
Ki samla pule kiba la wan shakhmat eh bad kiba la ioh ia ka jingpynkup burom da u Lat ka jylla ki kynthup ia I samla Saptarshi Bhattacharjee kaba wan ha ka kyrdan ba nyngkong ha ka HSSLC (Science), na Laban Bengali Boys’ HSS, I samla Idawanplishisha Swer, ha ka kyrdan ba nyngkong ha ka HSSLC (Arts) na St. Edmund’s HSS, Shillong, I Samla Disha Chokoni, ha ka kyrdan ba nyngkong ha ka HSSLC (Commerce) na St. Anthony’s HSS Shillong, I Samla Leisha Agarwal ha ka kyrdan ba nyngkong ha ka SSLC na St. Margaret’s HSS, Shillong bad I Samla Avila Kathrene P. Lyngdoh ha ka kyrdan ba nyngkong ha ka SSLC, na North Liberty HSS, Jowai.
U Lat ka jylla, u CH Vijayashankar, u la shim ia kabu ban ai khublei kyrpang ia kine ki samla pule kiba la leh bha ha ki jingpule ban ai mynsiem ruh ia ki ba kin dang trei shitom ban poi sha ki kyrdan kiba shaneng.
“ Baroh na phi kin sa don kiba long doctor, Engineer, bad ki khraw pyrkhat ha ka pule ka puthi bad ha kiwei kiwei ki kyrdan ki ban sa pynlong khraw ia ka jylla Meghalaya bad ia ka ri India hi baroh kawei” ong u Lat ka jylla bad bynrap ruh da kaba ong ba bun ki samla kiba dei ki riewlum bad kiba na nongkyndong ki lah ban ia khun ia shibun ki jingeh ba ki ia kynduh ha ka jingim bad kane ka pynpaw ia ka jingjop jongki, haba ki la poi sha ka thong kaba ki angnud bad kaba long ka jingai mynsiem ia kiwei ki samla” u la bynrap.
Shuh shuh, u Lat ka jylla u la ai khublei kyrpang ruh ia ka MBOSE kaba la trei shitom ban pyniaid bha ia ki Examination bad u la kyntu ruh ba ki dei ban pyntreikam noh ia ka National Education Policy (NEP) 2020, da kaba ban khia ia ka jingpule kaba kham janai bad ba ki samla kin ia ryngkat dor bad kiwei ki skul ha ka ri kiba la pyntreikam bhai a katei ka Education Policy.
