Nongpoh, Jymmang 17: Ka long shisha ka sngi kaba kmen eh bad ki ummat jong ka jingkmen ki tuid ha kawei ka longïing, ba ka Social Economic and Live Development (SELD) Committee jong ka Nongjri District ba kynthup ia ki 8 tylli ki Balang jong ka Presbyterian ki la lah ba plie paidbah noh ia kawei ka ïing kaba ki la shna sngewbha bad ruh ban aiti ia kane ka ïing sha ka Kong Therisia Mawphniang kaba long ka nongioh pdiang iakane ka ïing ba hap ha ka Balang Presbyterian Syad Lyngdoh.
Ia kane ka ïing la wan ban plie da u Rev. H.L Khongwir, u Moderator ba rim ka KJP Synod Sepngi kum u kongsan bad la don ryngkat lang ruh u MLA ka Mawhati, u Bah Charles Margnar, bad uba dei ruh u secretary ka SELD Committee uba la don bynta kaba khraw ban pynieng ia kane ka ïing.
La sakhi lang ruh ha kane ka sngi da ka jingdon lang ki nongialam bad ki dhot ka SELD Committee bad ruh kynthup ia ka Kong Therisia Mawphniang, kiba la ioh pdiang ia kane ka ïing ba la pynshna da ka SELD Committee.
Kumba la pynpaw, ia kane ka ïing la shna ha ka jinglut kaba la kot sha ka T. 3 lak tyngka bad ka long ruh shisha ka jingkmen ba kane ka longïing ba la ioh pdiang ki la ioh ban pyndonkam ia katei ka ïing kum ka jaka riehtngen bad ban saindur ia ka longïingn ka longsem.
Haba plie bad aiti ia kane ka ïing kaba la pynshna itynnad bha, u Rev. H.L Khongwir u la ai ruh ryngkat ka jingduwai bad ka jingkyrkhu kyrdoh ban pynkyntang ia kane ka ïing ba ka long ka ing kaba skhem bad ka ban dang ioh pdiang shibun ki jingkyrkhu na U Blei.
La ai jingkren ruh ha kane ka sngi da u Bah Charles Marngar, MLA bad uba dei ruh u Secretary ka SELD Committee, u la pynpaw ia ka mynsiem jong ka jingsngewkhia ba dang don bun ki longïing longsem kiba dang duk dang kyrduh ha ka imalang ka sahlang jongngi bad ha kawei ka bynta u pynpaw pat ia ka mynsiem jong ka jingsngewkmen ba lyngba ka SELD Committee la lah ban pynshna kat kane ka ïing kaba itynnad ba la aiti noh mynta sha ka Kong Therisia Mawphniang bad ia ka ïing ka sem jongki.
U la ai mynsiem ruh ia kane ka SELD Committee jong ka Distirct Nongjri ba kin dang bteng ia kum kane ka kam kaba khraw ka ban kdup ia ki duk ki rangli bad u la pynpaw ruh ba ngi dei ban don lang kata ka mynsiem jong ka jingiatrei lang khnang ba ngin dang lah ban kner ia kita ki lad jingiarap sha kito ki longïing kiba don ha ka jingduk ka jingkyrduh.ï
Na ka liang ka Kong Therisia Mawphniang ruh ha kane ka sngi ka la ai khublei kyrpang ia ka SELD Committee bad kumjuh ruh ia u MLA ka Mawhati uba dei ruh u Secretary, namar dei lyngba ka jingkylluid mynsiem jongki, la lah ban tei ia kane ka ïing kaba ki la aiti shaka mynta ka sngi ba kan long kum kata ka ïing ba kin shong kin sah ha ka ban saindur ia ka longïing ka longsem.
