Shillong, Jymmang 17: U Myntri rangbah ka jylla Meghalaya, u Conrad K. Sangma mynta ka sngi da lade u la hiar sha Wahlyngkhat ba hap ha ka Pynursla Sub Division East Khasi Hills na ka bynta ban leit peit leit jngoh ia ki jingpyntrei kam ia ki kam pynroi kiba ka sorkar ka la buh ia ka thong ban kyntiew ia ki kam jngohkai pyrthei.
Kane ka jinghiar u Myntri rangbah ban leit jngoh ne jurip sha Wahlyngkhat ki kynthup ia ka jingjurip ia ka jingpyntrei ia ka Living Root Bridges Experience Centre, Wahlyngkhat, ka Wahkhen Residential Music Retreat bad kiwei kiwei ki kam pynroi kiba la shna kyrpang ban kyntiew ia ka kam jngohkai pyrthei ka jylla.
Kumba la pynpaw, ka sorkar jylla ka la mang haduh Rs. 70 klur ban tei itynnad ia ka Living Bridges Experience Centre bad kynthup ruh ia ka Wahkhen residential Music Retreat. Nalor katei ka mang tyngka, ka kynthup ruh ki projek ban pyntrei ha Mawkyrnot, Rangthylliang bad ka shnong Mynrieng, kiba dei ki projek ban shna ia ki lynti iaid kjat (Trekking Circuit bad kiwei kiwei ki kam pynroi ki ban khring ia ki nongwan jngohkai pyrthei sha kane ka jylla.
Haba kren ha kane ka sngi, u Myntri rangbah ka jylla, u la ong ba ka sorkar ka la jied ia katei ka jaka ban kyntiew ia ki kam jngohkai pyrthei, ka dei ruh namar ka jingdon kita ki jingkieng ba la shna da ki ler jri bad ki dei ruh kita ki jingkieng jri kiba la long kyrpang kiba don ia kata ka jingkhring ia ki paidbah ha ka thain Wahlyngkhat.
U la pyntip ruh ka jingthmu ka sorkar ban shna ia ka Wahkhen residential music retreat , ka long ban khring ia ki nongjngohkai pyrthei ba kin tip halor ka jingriewspah ka jylla ha ka jinglong tynrai naduh ka put ka tem, ka riam ka beit bad kiwei kiwei ki riti ki dustur jong ka jylla.
