Nongpoh, Jymmang 17: Haba kut noh ka lympung ialehkai phutbol ia kaba la pynlong da ka Umpowin Social and Cultural Sports Club (US&CSC) ha Madan ialehkai ka shnong Umpowin, ka Rynjah Sports Club, ka la ïoh ban rah ia ka nam lahduh bad kata ka dei hadien ba ka la lah ban pynliem noh ia ka Umpowin Sports Club da 2-1, ha ka jingiakhun phainal kaba la long mynta ka sngi ha Madan Umpowin.
Haba pynkut ia katei ka lympung ialehkai phutbol, la sakhi da ka jingdon u Bah Charles Marngar, MLA Mawhati kum u Kongsan bad u Bah Kynjoh Ryntong, MDC kum u Symbud Kongsan, ia kaba la sakhi lang ruh da ka jingdon u Samla Iaraplang Shadap, President ka US&CSC, ki nongialam Shnong lem bad ki riew Rangbah ka thain.
Ha katei ka jingiakhun phainal, ka la dei ka jingiakhun kaba itynnad bad kaba shongshit eh bad kata ka dei na ka jingtuid ki paidbah, kiba la leit ban sakhi ia katei ka jingiakhun phainal bad ruh ban ai jingkyrshan ia la ki jong ki kynhun.
Ha ka jingiakhun, watla ka dei ka jingiakhaid, hynrei haduh ba kut ka jingiakhun, ka Rynjah SC ka la lah ban pynliem noh ia ka Umpowin SC da 2-1 bad pynthikna syndon ïalade ban long kum ka lahduh ha katei ka lympung ialehkai phutbol jong ka US&CSC.
Haba ai jingkren ha katei ka sngi u Bah Charles Marngar kum u Kongsan, u la ai jingiaroh ia ki nongialam ka US&CSC, namar ba ki la lah ban pynlong ia kaba kum katei ka lympung ialehkai, kaba long ruh kum kawei na ki rynsan ban kyntiew ia ka sap ka phong jong ki khun samla bad khamtam eh na bynta jong kito kiba donsap shisha ha ka kam ialehkai phutbol.
