Nongpoh, Jymmang 19: Ki 5 ngut ki Nong Bangladesh ba kynthup ia u Kpa, ka kmie bad 3 ngut ki Khun ki la shah kem ha ki Pulit ka Ri Bhoi, kaba dei hadien ba kim shym la don satia ki kot ki sla ba ki la ioh bor ban wan rung sha India.
Kine ki 5 ngut ki Nong Bangladesh kiba la shah kem ha ki Pulit ka Ri Bhoi, ki kynthup ia u Hafix Sigdah (56), ka lok jong u ka Ujala Begum (35) bad 3 ngut ki khun jongki.
Kumba la ioh lum jingtip na ki Pulit ka Ri Bhoi, la ong ba kane ka jingioh kem ia kitei ki Nong Bangladesh ka dei hadien ka jingioh bat ia kawei ka Kali Tourist ba ki la pynsangeh ha Byrnihat kumba ha ka por 7 baje ei ei mynstep bad ka jingtalasi la lap ia kitei ki 5 ngut ki Nong Bangladesh kiba ym don kot don sla satia.
La ong ruh ba kine ki 5 ngut ki Nong Bangladesh ki dei kiba la wan rung beain ha u snem ba la dep bad kane ka jingioh kem ka dei hadien ba ki la thmu ban leit phai biang sha Bangladesh da kaba pyndonkam ia ka surok ban iaid lyngba ka Shillong sha Bangladesh.
Shuh shuh, ki Pulit ka Ri Bhoi hadien ka jingioh kem la register case pyrshah ia ki bad ruh la dep ban phah sha ka District mynta ka sngi. Ka jingtohkit halor kane ka jingioh kem ia kine ki Nong Bangladesh ka dang iaid shakhmat.
