Nongpoh, Jymmang 24: Haba kren hakhmat ki nongialam bad dkhot ka seng, kata ha ka sngi ba la pynskhem bad pynthymmai ia ki nongkitkam ka FKJGP Byrnihat Circle, u Bah Dundee C. Khongsit, President rangbah ka FKJGP Sengkmie, u la kyntu ia ki nongialam bad dkhot ka Seng, ba haba ki don ha ka seng, kam mut ka ki ba kin shu shim kabu tang na bynta ki kam myntoi shimet, hynrei u la kyntu ia ki ba ki dei ban long kum ka nuksa babha na bynta kiwei bad ha ka imlang sahlang.
Kum u nongialam ba Rangbah ka FKJGP, u Bah Dundee C Khongsit, nalor katei ka jingkyntu ia kitei ki nongialam bad dkhot ka seng, hynrei u la kyntu ruh ia ki ba ki dei ban long kiba trei shitom bad khamtam eh na bynta ka iohkam iohkam ki khun samla, ha kaba u la kyntu ia ki, ba ki dei ban phaikhmat ruh ha ki kam ban pyniohkam ia ki samla khlem kam khlem jam, kata da kaba iakren pyniohkam sha ki karkhana bapher bapher kiba don ha ka thaiñ Byrnihat.
Katei ka jingpynskhem ia ki nongkitkam ka FKJGP Byrnihat Circle, ka dei hadien ba ka samoi treikam jong kiba rim ka la kut noh, hynrei kitei kiba la shah pynskhem, ka long na bynta ka samoi treikam jong u snem 2025-2028.
Lyngba jong katei ka sngi, ia kaba la ïoh ban pynskhem ia nongkitkam ba thymmai ka FKJGP Byrnihat Circle, ka la don ruh ka jingpynthymmai ne pynskhem ia ki pynskhem ia ki nongkitkam ka 15Mer Unit bad Narbong Area Unit.
Ia katei ka jingialang ban pynskhem ia ki nongkitkam ka FKJGP Byrnihat Circle, la pynlong ha Auditorium Hall Byrnihat Proper, ha kaba la wan ban pynskhem da u Bah Dundee C Khongsit, President rangbah ka FKJGP, ha ka jingdon u Bah Luistar Lyngdoh, President ka FKJGP NKHD, u Paiem Kem Syiem, Syiem ka Raid Marwet, ki nongialam na kiwei ki kynhun sengbhalang, ki Rangbah Shnong lem bad shibun ki riew Rangbah jong ka thaiñ Byrnihat hi baroh kawei.
Lyngba katei ka sngi kaba la pynskhem ia kitei ki nongkitkam ka Byrnihat Circle, ha kaba la jied ia u Kitborlang Suting, kum u President, nangta u Devos Chyne kum u Vice-President, u samla Noah Khongstid, kum u General Secretary lem bad kiwei de kiba long kum ki dkhot hapoh ka Executive Committee.
