Nongpoh, Jymmang 24: Katto katne hadien ba u Manbhalang Phankon, u la thad bad pynjah burom ia u Ken Syiem, Syiem ka Raid Marwet haka 22 tarik u Jymmang 2025 ha ki lad pathaikhubor, da kaba kynnoh ba u Syiem Raid Marwet, u donkti ban die ia ka khyndew ka Shyiap sha ki bar jylla, mynta ka sngi u Syiem Marwet, haba kren sha ki lad pathaikhubor, u la dawa na u Manbhalang Phankon, ba u dei ban panmap bad nalorkata, u la ong ruh ba un sa ujor sha Iingbishar pyrshah ia u Manbhalang Phankon, halor ka jingkynnoh kaba khlem nongrim jong u bad kaba la pynjah burom ia u Syiem bad ban dawa baimynrain khmat na une u samla.
Kum ban kdew hangne, ba dang ha kine ki khyndiat sngi, u Bah Manbhalang Phankon, u la leit ujor sha u CEM ka Khasi Hills Autonomous District Council (KHADC), ha kaba ka jingleit kynduh jong u ia u CEM, ka long ban pynpaw ia ka jingbym hun mynsiem ia ka jubab lyngba RTI, kaba utei u samla u la wad jingtip halor ka rukom die bad thied jaka ki bar jylla ha ki shnong bapher bapher kiba hap ha Raid Marwet, ia kaba u la wad lyngba ka ophis u Syiem ka Hima Mylliem, hynrei ka Hima Mylliem ka la phah ia katei ka shithi wat jingtip sha Ophis u Syiem ka Raid Marwet.
Haba kren halor katei ka jingshah kynnoh, u Ken Syiem, u la ong ba ha ki jingkren jong Manbhalang Phankon, la don ruh ki kyntien kiba kynnoh pyrshah ia u Syiem, ba u la donkti ban die jaka sha ki bar jylla, kaba long pyrshah ia ka Meghalaya Land Transfer Act. 1971.
U Syiem Marwet, u la dawa ba u hap ban pynshai ba haei ka jaka ba u la die sha ki bar jylla bad nalorkata u hap ban panmap paidbah ruh ha ki lad pathaikhubor, namar katei ka jingkynnoh ba khlem nongrim jong u, ka pynjah burom eh ia nga, khamtam ba nga khlem donkti ha kiba kum kita ki kam leh beain ban die jaka sha ki bar jylla.
Shuh shuh, u la ong ruh ba balei ki briew ki shu peit khmat beit tang ia ka Raid Marwet, hato don aiu ha Raid Marwet, ha kaba kane ka jingphai khmat ki briew tang sha Raid Marwet, ka pynsuba sniew pynban, namar ka kiwei pat ki Raid kiba don ha kiwei ki jaka khappud ym ju don ban iakren ia khana.
U la pynkut da kaba, ba lada uta u Manbhalang Phankon, u dei shisha uta u briew uba kwah ban treibha na bynta ka Raid Marwet, u dei ban wan iakren bad ai ia kita ki buit ki bor kaba u don sha ki nongialam ka Raid, bad u dei ruh ban wan ïarap ban iada iaki khappud namar ka dei ka raid ba ker da ki wei pat ki jylla, namar dei ki trai Raid ki ba ieng ba trei naka bynta ka bha ka miat lane da don kano kano ka jing jia haka Raid, hynrei u ne u samla u ba sah shaei ruh ngam tip hynrei ban wan kren shaphang ka raid bad ban kynthoh iaka Dorbar Raid Marwet khlem ki sakhi bad ka jingtip ba bniah kam long kaba iahap satia la pynkut u Syiem.
