Nongpoh, Jylliew 08: Da ka jingrhem mynsiem bad da ka jingshongkun mynta ka sngi ka Balang Presbyterian Umdihar ka la pynhap pyrda noh ïa ka jingrakhe ïa ka Diamond Jubilee bad haba pynhap pyrda ïa kane ka jingrakhe Diamond Jubilee la pynlong da ka jingïaseng kyrpang naduh ka por mynstep nad haduh ka ka noh phai sngi.
Kum ban kyrtiangdien, ka Balang Presbyterian Umdihar ka la ïaid lynti la 60 tylli ki snem naduh ba la sengi a kane ka Balang ha ka 6 tarik u Jylliew 1965 bad ka long ka jingkmen ba kane ka Balang ka la dang rhem bad dang khlaiñ ha ki kam shakri ïa u Blei tad haduh ba la lah ruh ban rakhe burom ïa kane ka Diamond Jubilee.
Ka phang jong kane ka jingrakhe ïa ka Diamond Jubilee, ka dei kaba la sot na ka ktien ka jong u Blei na Kitab ba nyngkong jong u Samuel na ka Lynnong kaba 7:12 kaba ong kumne, “Haduh Katne U Trai U la ïarap ïangi”kiba la long shisha ki kyntien ai mynsiem ïa ki paid riewngeit ka Balang Presbyterian Umdihar.
La wan ban ai mynsiem ruh ha kane ka sngi da u MP ka Shillong, u Dr. Ricky A.J Syngkon uba la sam ïa ka ktien u Blei ha ka jingïaseng mynstep bad u Rev. H.K Nongbsap uba la sam ïa ka ktien ka joing u Blei ha ka jingïaseng noh phai sngi.
Naduh u Dr. Ricky A.J Syngkon bad u Rev. H.K Nongbsap haba sam bad ban pharia ïa ka ktien ka jong u Blei, nyngkong eh ki la ai khublei kyrpang ïa ka Balang Presbyterian Umdihar bad ruh ïa ki paid riewngeit, kiba la ïaineh ha ka jingshakri ïa u Blei lyngba kane ka kynhun balang hapoh ka Shnong bad ki ai ruh ka jingkitbok kit rwiang ba kane ka Balang kan dang kiew shaphrang ha baroh ki liang khamtam ha kaba ïalap ïa ka ktien ka jong u Blei bad ban dang lah ban pynim ïa kiba bun ki mynsiem ba kordor lyngba ka jingshakri hapoh ka Balang.
Shuh shuh, ki la kyntu ruh ïa ki paid riewngeit kumba ki la ïaid lynti mynta la 60 tylli ki snem, kum ki paid jong u Blei ki dei ban dang san ha ka jingim ba kynja mynsiem bad ban dang pynkhlaiñ ïa ka jingshakri ha ka kam ka jong U Blei, khang ba ki paid riewngeit ka Balang kin dang khlaiñ ha ka jingshakri ïa u Blei bad ruh ba kae ka Balang kan dang paw bad dang khlaiñ ban dang ai burom shuh shuh ïa U Blei Nongbuh Nongthaw.
Nalor kitei ki 2 ngut ki shakri u Blei kiba la sam ïa ka ktien ka jong u Blei, kaba la long ka jingbam ba kynja mynsiem ïa ki paid riewngeit, la pynphuh pynphieng ne ai mynsiem ruh ïa kane ka jingpynhap pyrda ïa ka Diamond Jubilee lyngba ki jingrwai Choir na ka Balang Presbyterian Umdihar, Balang Umtasor Nongrim Jyrmi, Junior C.E Society Balang Presbyterian Umdihar bad ka na ka Jingïaseng Kynthei ka Balang Presbyterian Umdihar.
