Shillong, Jylliew 09: Na ka jingjia ki shi kurim kiba wan shangkai pyrthei sha Meghalaya ha ka thain Sohra ka la pynkhihwin bad pynlyngwir shisha ym tang ia ka jylla Meghalaya bad kane ka la pynkhihwin ruh ha ka ri hi baroh kawei, namar hadien 17 sngi ba kitei ki shi kurim ki la poi sha Sohra da kaba kam ba ki wan shangkai pyrthei hadien ka jingiathoh shongkurim bad ka Sonam pat ka la leit poi pynban sha ka jylla Uttar Pradesh ba ki Pulit ki la ioh kem syndon ia ka bad kyntup 3 ngut kiba la kynnoh don kti ha kaba pyniap ia u kurim jongka ha Sohra.
Kum ban pynkynmaw, u Raja Raghuvanshi bad ka Sonam Raghuvanshi ki la wan poi sha Sohra ha ka 22 tarik u Jymmang 2025 bad dei tang ha ka sngi kaba bud kata ha ka 23 tarik u Jymmang 2025 la mih ka khubor ba ki la jah bad ym shym la tip shuh shaei ki la jah. Dei lyngba ka jingshim khia ki bor pulit ka Meghalaya, ka State Disaster Response Force (SDRF), ka National Disaster Response Force (NDRF), ki bor shnong bad na baroh ki liang ha ka jingbteng ban wad la lap noh ia ka met u Raja Raghuvanshi kaba la pyud hajan ka Wei Sawdong ha Sohra.
Tad haduh kine ki sngi ruh, ka jingbym lap ia ka Sonam ba la kynnoh ba ka la jah ka la buh umdum ia ka jylla bad ka ri hi baroh kawei bad dei haduh mynta ka step ba la lap ia ka na Uttar Pradesh kaba la pynkyndit lut ia ki bor sorkar, ki bor pulit bad ki paidbah ba kumno ka leit poi sha ka jylla Uttar Pradesh.
Katkum ka khubor ba la pynmih ha ki lad pathai khubor ka Rithor, ka jingioh kem ia ka Sonam ka dei lyngba u trai jong kawei ka dukan Dhaba ha Uttar Pradesh, ba ka Sonam ka la wan poi ha katei ka dukan ha ka por 1 baje mynstep mynta ka sngi ryngkat ki ummat ba ka la pan ia ka phone na u trai Dhaba U Sahil Yadav ban phone sha kiba haing ba ka la phone noh ia u hymmen jongka u Govind ban pyntip ba ka la don sha ka jylla Uttar Pradesh.
Haba kren halor ka jingioh kem ia ka Sonam kaba la wan pyndem sha ki Pulit ka Ghazipur, Uttar Pradesh, ka dei lyngba u trai katei ka Dukan Dhaba, kaba hadien ba u la ia kren bad kylli pyrthew u la pyntip noh sha ki Pulit kiba la wan kem noh ia ka Sonam, ha kaba mynta ka don hapdeng ka jingpeit jingkmih bad ka jingtohkit ki Pulit ka Uttar Pradesh.
