Nongpoh, Jylliew 10: Ki kynhun seng bhalang bapher bapher naka thaiñ Umden mynta ka sngi kila thang ïaka tyngshop jong u Conrad Sangma Myntri Rangbah ka jylla, u Prestone Tynsong Symbud Myntri Rangbah bad u Bah Mayral Born Syiem MLA ka Nongpoh kum ka jingpyrshah jur halor ka jingmynthi ka sorkar MDA II ban sngap ïaka jingdawa jong ki paidbah khamtam ka jingshah thngan jong ka Kong Bindas Syiem ha nongbah Shillong ban dawa ba dei ban siang rong mardor ïa utei u surok.
Naka liang ka seng HITO bad kiwei kiwei ki kynhun kila khang ruh ïaki paidbah ba leit ba wan naduh ka por 6 baje mynstep khamtam ki kali kamai bad pynlait tang ïaki khynnah pule, ki nonghikai bad ki kali kit nongpang kum ka jingai jingkyrshan ïaka longkmie kaba la lamkhmat ban shah thngan khlem buh por bala kot shaka 5 sngi lynter.
Naka liang u Samla Marius Mallai kum u President ka seng HITO Umden Circle u la ong ba kum ka seng ka kwah ba ki paidbah kin snohkti lang haka jingshah thngan jong ka kong Bindas Syiem namar ka jingsyrtok ki paidbah kala long shaba palat haka liang u surok bad shem jingeh shi katdei haka leit ka wan ba dei halor katei ka Nongrim kum ki kynnun seng bhalang bapher bapher kila shim ïaka sienjam ban thang syndon ïa ki tyngshop jong ki bad ban pynrem jur ïaka sorkar MDA II.
THANG KI SENG BHALANG ÏAKA TYNGSHOP U CONRAD, PRESTONE BAD MAYRAL BORN, PYNREM JUR ÏAKA SORKAR MDA II
