Nongpoh, Jylliew 14: Ka Dorbar Shnong Umshangling ka la hap syndon ban khang dam ïa ka jaka theh ñiut jongki shnong ba hap ha ka sor Nongpoh, kaba dei na ka daw ka jingjur ka sma iwtung ba la shu bret pathar ïa ki jaboh haduh ba u skain u la poi sha ki ing ki sem bad ki paidbah ki hap ban bam ja ryngkat u skain uba kim lah ban ïada ei ei.
Ka Dorbar Shnong Umshangling ka la khang dam syndon ïa katei ka jaka theh ñiut mynta la 3 sngi kynthih ha kaba ka la buh jingeh ïa ki shnong bad ki iew ki hat na ka sor Nongpoh ba kim don jaka shuh ban leit bret ñiut, na ka daw ba ka shnong kam shah shuh ban leit theh ñiut ha katei ka jaka theh ñiut kaba don ha ka Shnong Umshangling ha ka thaiñ Nongpoh.
Halor kane ka jingeh ki paidbah ba shah ktah na ka jingsma iwtung, ka Synjuk ki Rangbah Shnong jong ka phra Shnong hapoh ka Pahamrioh Circle lem bad ka Dorbar Shnong Umshangling mynta ka sngi ki la leit ban jurip ïa katei ka jaka theh ñiut bad la lap shisha ba ka jingbret ïa ki jaboh ka la ktah shisha bad ka la mih tang ka jingsma iwtung bad ki skain ba bun jaid ki la boi ba ka rukom bret ñiut kam dei kaba paka ha kaba la buh jingeh naduh ka koit ka khiah bad ka bam ka dih ki nongshong shnong.
Ha kane ka jingleit jurip la ïalam da u Chairman ka Synjuk, u Bah Stephan Kshiar, u Rangbah Shnong ka Umshangling, u Bah James Maiong, u Secretary Shnong, u Bah Vincent Sohkhwai, ki dkot ka synjuk lem bad ki longkmie ki longkpa ka Shnong Umshangling.
Haba kren sha ki lad pathai khubor, naduh u Chairman ka Synjuk, u Bah Stephan Kshiar bad u Secretary Shnong, u Bah Vincent Sohkhwai, ki la ong ba ka rai ba la shim da ka synjuk bad ka shnong, ka long ban khangdam beit bad ban nym ailad shuh ban wan theh ñiut sha katei ka jaka ba don hapoh ka shnong, namar ka sorkar bad ki bor ba dei peit hapoh ka District ki la lehbein sha ba palat bad kim don shuh ka jingsngew ïa ka jingktah ki paidbah ha ka koit ka khiah bad ka jingsma ingtung kaba la ktah lut ha baroh ki liang.
La pynpaw ruh tad haduh ba la khang ban wan theh ñiut ha katei ka jaka, la mih ka jingïakren naduh ki rangbah shnong ba hap hapoh ka Nongpoh Town Committee bad ka bor District bad shaei ki jah la katta bad kim pyrkhat satia ïa ka jingshah ktah ki paidbah, ong kitei ki nongïalam.
Ki la pynpaw ruh ba ki la shim syndon da ka rai kaba tyngeh, kata ban khang dam beit ïa katei ka jaka theh ñiut katba ka sorkar kam pat lah ban pynbiang ïa ki mat ba la dawa, namar lada ailad ban dang wan theh ñiut kiba shah ktah ki dei ki nongshong shnong kiba hap ban ring ïa ka lyer ba sma iwtung bad ruh kaba la buh jingeh ruh ban bam ban dih ba ki skain ki la rung shaduh ki tyngkong ïing.
Kane ka jingkhang dam ka shnong ïa kane ka jaka theh niut, ka la buh jingeh shisha ruh ïa ki shnong ha sor Nongpoh bad wat ki Hospital kum ka Bethany Hospital, ka Civil Hospital bad kiwei ki dukan heh kim ioh jaka shuh ban theh niut ha kaba kane ka la buh jingeh ha baroh ki liang.
