Nongpoh, Jylliew 30: Ban dang pynshlur ïa ki khun samla ka dong Ri Bhoi ba kin mih shakhmat ha kaba shim kabu ban aireng ha ki examination thungkam bapher bapher, ka ophis u Deputy Commissioner ka Ri Bhoi mynta ka sngi ka la plie paidbah ïaka prokram ai jinghikai sha ki khun samla ka Ri Bhoi District da kaba ai ïa ki lad jinghikai kiba kyrpang halor kitei ki bynta ba kum ki samla ki dei ban pyntbit ïa lade.
Ïa kene ka prokram ai jinghikai la plie paidbah mynta ka sngi ha Ri Bhoi College ba hap ha ka Umling C&RD Block bad kane ka prokram ai jinghikai ka long kyrpang ruh na ka bynta jong baroh ki samla ba hap ha kane ka Umling C&RD Block.
Ïa kane ka prokram ai jinghikai la shim bynta da u MLA ka Nongpoh, u Bah Mayral Born Syiem kum u kongsan bad la sakhi lang ruh da ka jingdon lang u Deputy Commissioner ka Ri Bhoi, u Abhilash Baranwal, u BDO ka Umling C&RD Block u Bah Eric Kevin Dkhar, u Soumen Das, Director ka TIME, Shillong-Guwahati, ki samla lem bad kiwei kiwei de.
Kane ka prokram ai jinghikai ba la plie paidbah mynta ka sngi, ka dei shi bynta na ka Chief Minister’s Career Guidance and Counselling Scheme, kaba dei kawei na ka lad jingmyntoi ba ka sorkar ka la pyntreikam na ka bynta ban ai jinghikai pyntbit ïa ki samla, ha kaba la pynlong da ka ophis u ophis u Deputy Commisioner ka Ri Bhoi bad ryngkat ka jingïatrei lang ki MLA bad ka Triumphant Institute Of Management Of Education (TIME), Shillong-Guwahati.
