Nongpoh, Jylliew 30: Ban tip kham bha ïa ka jingeh ha ka imlang ka sahlang bad ka jingeh ba ki paidbah ki ïa kynduh, ka Committee on Petition jong ka Meghalaya Legislative Assembly ryngkat ka jingïatrei lang bad ka ophis u Deputy Commissioner ka Ri Bhoi Distirct mynta ka sngi ki la pynlong da ka prokram ai jinghikai ban batai halor ka jingthmu jong katei ka Committee on Petition ba la shim bynta da ki dkhot jong katei ka Committee kiba la pynshai halor ka rukom treikam ka Committee.
Ïa kane ka prokram la pynlong ha Science Hall, Nongpoh, ha kaba la pynïaid da u MLA ka Mawlai kum u dkhot ka Committee bad la don lang ruh ki dkhot ka Committee naduh u MLA ka Mawhati u Bah Charles Marngar, u Dr Mizanur R Kazi, MLA ka Rajabala, U Remington G Momin, MLA ka Rambrai Jyrngam bad la don lang ruh u Local MLA ka Nongpoh u Bah Mayralborn Syiem.
Kiwei kiwei kiba la ïa don lang ki kynthup ruh ïa u Deputy Commissioner ka Ri Bhoi, u Abhilash Baranwal, u Project Director ka DRDA, u Raja Brahma, ki BDO na ki 4 tylli ki Block bad kyntup ki kynhun SHG bad ki Village Organization na Ri Bhoi District.
Kumba la pynshai ha kane ka sngi, ka jingthmu ba la pynlong ïa kane ka prokram ai jinghikai halor ka Committee on Petition, ka dei ka thong jong ka sorkar ba lyngba kane ka Committee ki paidbah ki lah ban pyntip ne ujor ïa ki jingeh jongki sha kane ka Committee ïa kino kino ki jingeh ne ki jingduna ha kaba ïa dei bad ki kam pynroi bad kane ka Committee pat kan sa rah sha ka sorkar ban ïa kren ne ïa thir na ka bynta ban weng ïa kita ki jingeh ba ki paidbah ki ïa kynduh ha ka imlang ka sahlang.
