Nongpoh, Naitung 09: Tang hadien ka jingshimti u Bah A Basaïawmoit, Deputy Secretary ka Khasi Hills Autonomous District Council (KHADC), kum u Administrator jong ka Elaka Nongpoh Sirdarship, hynne ka sngi u la leit ban shong jingïalang bad ki nongialam jong ka Hima ban ïatai halor ka jingdonkam ban pynbha bad pynkylla ïa ki rukom treikam bad kumjuh ruh ïa ki raid bapher bapher kiba hap hapoh kane ka Elaka.
Ha katei ka jingïalang, u Bah A Basaïawmoit u la aiti ruh kumba 50 tylli ki shuki bad ka duli sha ka ophis jong ka Hima ba kin ioh ban pyndonkam khamtam ban buh ïaki kot ki sla ba donkam.
U Bah Basaïawmoit u la pynpaw ba naduh ba u la shimti ïa ka kam kum u Administrator, u la shem ba ka Elaka ka dang don shibun ki jingduna ha ki liang bapher bapher. U la ong ba ha kine ki 3 bnai ba u shimti kum u Administrator un trei shitom ryngkat ka jingïatreilang bad ki nongialam ka Hima bad ki nongsynshar Raid ban ïai pynbha ïa ki shnong bad ki raid kiba don hapoh ka Elaka Nongpoh Sirdarship.
U la ong ruh ba haka jingïohi ïa ka jingbym don ki tiar ki tar ha ophis kum ki jaka buh kot bad ki shuki ka la pynlong ïa u ban shim ïa ka sienjam ban pynioh shwa da ki tiar da ka duli ban buh kot bad ki shuki na ka bynta ka jingtrei kam hapoh ka ophis jong ka Elaka.
