Ka Chelsea Football Club na ri England, ka la ioh ban rah ia ka namlahduh ha ka FIFA Club World Cup, ka lympung ialehkai kaba la iashimbynta da baroh ki klob ba pawnam ha ka pyrthei, kata ka dei hadien ba ka la lah ban pynliem noh da 3-0 pyrshah ia ka Paris Saint-Germain na France bad kaba dei ruh ka kynhun kaba dang shu jop shen ia ka UEFA Champion League.
Ka jingiakhun phainal jong ka FIFA Club World Cup, la pynlong ha MetLife Stadium ha United States, ha kaba u Donald Trump, President ka US, u la leit ban sakhi ia katei ka jingiakhun phainal.
Haba phai sha katei ka jingiakhun, tang ha ka kylla step ka Chelsea FC, ka la ioh ban tangon tyngeh ia ka PSG, da kaba thep haduh 3 kol, ia kaba la thep da u Cole Palmer ha ka minit ba 22 bad 30, bud sa ka shikol na u Joao Pedro, uba la thep ha ka minit ba 43 shwa ban kut ka kylla step.
Haba bteng ka kylla miet, ka jingiakhun ka la nang khluid bad ki rangialehkai ka PSG, ki la pyrshang ban nion tyngeh na bynta ban ioh pynphai ia kitei ki kol ba ki la shah thep, hynrei haduh ba kut ki 90 minit, ki khlem ioh ban pynphai bad kiba la hap ban hun ia ka namrem kaba 3-0 hakhmat ka Chelsea.
