Jowai, Naitung 14: Haba pynkut noh ia kawei na ka lehniam tynrai hapoh rilum Jaintia ba la tip kum ka Beh Deinkhlam mynta ka sngi, da ki hajar ngut ki khun ki hajar ka Seinraij Jowai ki la shim bynta ban sakhi ia kane ka lehniam lehrukom jong ka kane ka shad Beh Deinkhlam kaba la pynkut ha Pung Aitnar.
Haba pynkut ia kane ka lehniam, ka Seinraij Shillong, Seng Khasi Kmie, Seintyllilang Niamtre Ladthadlaboh, Seinraij Ummulong kumjuh ki Dorbar Shnong ba kynthup ka Loomiongkjam, Loomkyrwiang, Umshangiar, Panaliar, Dulong, Tpep Pale, Loompyrdi Iongpiah bad Iawmusiang ki la wanrah iaki rot jong ki ha ryngkat ka khubor sha ki khun ki hajar.
La sakhi lang ruh ha kane ka sngi da ka jingdon lang u Symbut Myntri Rangbah ka jylla, u Ma Sniawbhalang Dhar, uba la ai kata ka jingkyrkhu kyrdoh ia kane ka lehniam Beh Deinkhlam bad ruh sha ki khun ki hajar jong ka Seinraij Jowai.
Kiwei kiwei ki heh sorkar kiba la ia don lang ki kynthup ia ki Myntri ka sorkar Jylla ba kynthup ka Dr. Ampareen Lyngdoh bad Ma Kyrmen Shylla, ki MLA Ma Sanbor Shullai bad Ma Wailadmiki Shylla nalor u MP ka Rajya Sabha Dr. WR. Kharlukhi, ki MDC ka JHADC, ki ophisar sorkar bad kiwei kiwei.
Haba pynkut ia ka Beh Deinkhlam ha pung Aitnar, la iohi ba da ki phew hajar ngut ki riew ngeit na ri Khasi bad Jaintia kumjuh na kiwei ki Jylla bad nabar ri ki la wan ban sakhi lang.
