Shillong, Jylliew 11: Hadien ba la mih ka jingujor halor ka jingpyrshang ban leh jubor da ki bor pulit ka East Khasi Hills District ka jylla Meghalaya, ban pynkit jubor ia ka Kong Bindas Syiem katba ka dang iaid ka jingiakhih shah thngan ha ka jaka pynieng kali ka Additional Secretariat, na ka liang ki bor ka Meghalaya Human Right Commission (MHRC) ka la pynmih ia ka hukum ban khot hajir ia u Superintendent of Police u Rituraj Ravi ban wan mih hakhmat ka Commission hashwa ka 20 tarik u Jylliew 2024.
Katkum ka khubor lyngba u Secretary ka MHRC, la pyntikna ba ka Commission ka la sngap ia ka jingujor ba la ujor dang shen da ki nongialam ka KHNAM halor ka jingpyrshang ban pynkit jubor da ki pulit ka East Khasi Hills District ia ka Kong Bindas sha Civil Hospital Shillong kaba la jia ruh ha ka miet jong ka 9 tarik u Jylliew katba kane ka longkmie ka dang iaid shakhmat ia ka jingiakhih ban shah thngan khlem pud sngi ban dawa ia u surok thymmai na Nongpoh-Umden-Sonapur.
Shuh shuh ruh, ka kyrwoh na ka MHRC ka la pan ruh ia ka kaiphod kaba bniah bha na ka Director General of Police ka jylla Meghalaya halor kane ka jingjia ba la leh donbor da ki pulit pyrshah ia ka Kong Bindas.
BA THMU KIT JUBOR IA KA KONG BINDAS SHA HOSPITAL, KHOT HAJIR KA MHRC IA U SP KA EAST KHASI HILLS DISTRICT
