Shillong, Naitung 23: Ka Khasi Hills Autonomous District Council (KHADC) hapoh ka jingialam u CEM bad ki EM hynne ka sngi kala leit jurip iaka Law Adong ba don ba Mawpat, Shyiap bad Mawroh.
Kane ka jingleit jurip ka KHADC kadei hadien bala ioh jingujor, daka ba kynnoh ba ka don ka jingshah klun jaka haki bynta ka Law Adong.
Iaka jingleit jurip la ialam hi da u Chief Executive Member (CEM) ka KHADC u Bah Shemborlang Rynjah haka jingdon lang ki Executive Member (EM) bad u Chairman ka KHADC u Bah Strongpillar Kharjana nalor ki ophisar ka tnat treikam ka Council.
Haba kren shaki lad pathai khubor Chief Executive Member (CEM) ka KHADC u Bah Shemborlang Rynjah u la ong ba haka jingleit jurip, la lap shisha ba ka don ka jingshah klun jaka haki bynta ka Law Adong.
U Bah Shemborlang u la ong ba naka liang ka EC haki sngi ban wan kan shong jingialang ban iathir halor kane hashuwa ban shim iaka rai.
Ula ong ba naka liang ka EC kan shim iaka rai kaba bha tam ban iada iaka Law Adong namar kane ka khlaw ym tang baka long ka jingkyrkhu iaka briew hynrei wat iaki mrad khlaw.
