Shillong, Naitung 23: Ki bor ka Shillong Municipal Board (SMB) mynta ka sngi ka la sdang shaid shaid ban aiti ia ki dukan sha ki nongdie jingdie madan lyngba ka la jingpynkhalai nusib ba la pynlong hapoh ka jaka ba la pynbiang da ka sorkar jylla hapoh ka Parking Lot jong ka MUDA building.
Watla, hapdeng ka jingpynkhalai nusib na bynta ban aiti jaka die ia ki nongdie jingdie madan, la mih ka jingiapyninia bad ka jingpyrshah kaba jur na ki nongialam jong Meghalaya and Greater Shillong Progressive Hawkers and Street Vendors Association (MGSPHSVA) bad ka Thma U Rangli-Juki (TUR).
Lah ban kdew, ba ki bor ka SMB hadien ba la ioh jingbthah na ki bor pyniaid district ban pyniaid shakhmat halor ka jingai jaka shong die jingdie ia ki nongdie madan, mynta ka sngi ki la iaid shakhmat ban pynkhalai nusib bad la sakhi ruh ba la ai jingkyrshan ia ka tnad SMB da ka kynhun ki nongdie madan hapoh ka shatri jong ka Shillong Roadside Hawkers haka jingialam ka Kong Tellme Nongbri.
La sakhi ruh ia ka jingiania kaba jur hapdeng ki nongialam ka Meghalaya and Greater Shillong Progressive Hawkers and Street Vendors Association (MGSPHSVA) ba ialam daka Kong Biolin Pyrtuh bad ka Thma U Rangli-Juki (TUR) ba ialam daka Kong Angela Rangad kila wan poi ha Parking Lot MUDA ban pynpaw ka jingpyrshah.
Hadien bala ioh jied iala ki Nomber, ki nongdie jingdie madan kiba shim bynta haka khalai nusib kila leit shaka ki jaka ba ki la ioh ban shong bad iaishah ban ap la ka pali ban ioh ia ki nombar.
