Nongpoh, Naitung 24: Ka Federation of Khasi Jaiñtia and Garo People (FKJGP) Central Body, lyngba u Samla Kitboklang Nongphlang Vice President, kala kyrpad ïaka EC jong ka KHADC ban pyrkhing ïaka jingai Trading License sha kino kino ki riew shimet bad kumjuh ruh sha ki kynhun bad ki kompani kiba nabar jylla kiba thmu ban leh ia kino kino ki kam khaïï-pateng ha u pud u sam jong ka Khasi Hills Autonomous District Council.
Kum ban shu pynpaw ba naka liang ka seng dang ha kine ki khyndiat bnai bala dep kala dep ban khang bad pyrshah jur ia ki katto katne tylli Tender bala pyllait da ka National Institute of Fashion Technology (NIFT), Shillong ha kaba iadei bad ka jingkhot application na ka bynta ki kam Security (security personnel) lyngba ki kynhun bapher bapher. Ka jing pyrshah jong ka seng ka long ba hadien bala pule bad bishar bniah ia ki kyndon (criteria in the Bid Evaluation Sheet) bala buh da ka NIFT la lap bad shem ba ki long pynban kum ka jing plie lynti na ka bynta jong ki kynhun (Agencies/Firms) kiba na shabar.
Ha kane ka kynti kaba mynta ruh na ka liang jong ka seng kala ioh ia ka jingujor ba na ka liang jong ka National Institute of Technology (NIT), Meghalaya ruh kila pyrshang ban bud ia kitei kijuh ki sienjam kumba la leh da ka National Institute of Fashion Technology (NIFT), Shillong kum ka jing plie lad plie lynti na ka bynta jong ki kynhun kiba nabar (Non- Tribal Agencies/Firms).
Kumta na ka liang jong ka Federation of Khasi Jaiñtia and Garo People (FKJGP) Central Body, kala kyrpad ïaka KHADC ban shimkhia ban teh lakam ia ka jing ai Trading License sha kum kitei ki jait kynhun kiba na shabar kiba pyrshang ban knieh noh ia ka kam kamai jakpoh jong ki trai ri-trai muluk lyngba ki kam Khaii-pateng namar kum ka jaitbynriew kila don shibun ki kynhun kiba la la lah ban trei ia kum kitei ki jaitkam ban bat hi ia u lakam jong ka Khaii-pateng.
