Shillong, Naitung 25: Ka Hima Sohra Tourism Committee (HSTC) hynne ka sngi kala pynbna ba ki paidbah bas kynthup naduh ki trai Jylla bad ki nongjnohkai pyrthei kim lah ban wan bam khana khlem pat ioh jingbit naki Dorbar Shnong lane naka Committee.
Ia kane ka jingpyrkhing la leh hadien bala sakhi ka jingbret pathar ki briew iaki jaboh kynthup ki plastic, bilor haki surok bad haki jaka jngoh kai pyrthei ha kylleng ka thain Sohra.
Ia kane ka jingpyrkhing la pynbna da u Syiem Khynnah ka Hima Sohra u Paiem Maremdor Syiem.
Haba kren shaki lad pathai khubor u Paiem Maremdor ula pyntip ruh baka Hima Sohra Tourism Committee kala pynmih ia 5 tylli ki jingbthah ka ban treikam ia baroh kiba wankai sha Sohra naduh ki nongjngohkai pyrthei kynthup ki trai Jylla.
Kine ki jingbthah ki kynthup ym shah ban bam khana ne shet jingshet harud surok naduh ka surok Mawkdok-Sohra khlem ka jingbit naki Dorbar Shnong.
Ka Committee ka la mana ruh ba ym shah ban ieng kali bad bam bad dih ha rud surok Road.
La bthah ruh ia baroh ki kali naduh ki kali trai Jylla haduh ki kali Tourist kiba rung shaki thain Sohra ba kidei ban rah lypa iaki pla ban thep iaki jabaoh.
Haba iadei bad ki jaka sah miet lane Camping, ka Committee ka pynbna ba ym shah ban sah miet kulmar haki surok lait noh tang haki jaka bala ithuh kum ki Camping Site ba pyniaid daki Shnong, ki nongpyniaid Tourism hadien bala ioh jingbit.
La bthah ruh ba kino kino ki nongjnohkai pyrthei kiba leit kai (Trekking) shaki jaka ba kham jngai haki thain Sohra kidei ban wai daki Local Guides.
Haba iadei bad ki Media bad kiba ju ring Video ban thep haki rynsan Social Media, ka Hima Sohra Tourism Committee ka bthah kidei ban shim jingbit shwa naka Hima Sohra lane naka Committee.
