Nongpoh, Naitung 26: Kum ka jingai mynsiem iaki khun samla pule kiba la leh bha haka Exam ba kin nang pule khambha haki kyrdan kiba kham sah jrong, mynta ka sngi naka liang ka National People Youth Front NPYF Ribhoi District ka la pynkup burom ïaki spah ngut ki khun samla kiba la wan sha khmat haka kyrdan pule SSLC bad HSSLC kiba kynjoh shaduh ka 80 Percent haneng.
Ha katei ka sngi pynkup burom kaba la pynlong ha ka Hall jong ka Nongpoh Parish la ithuh kyrpang ruh ïa artylli ki kynhun ialehkai ball ki ban mihkhmat iaka jylla sha ka National Level Inter school Subroto cup kiba kynthup iaka Ningjri Presbyterian Sec.School bad ka Mawtneng UP & Sec. School bad ia u Samla Johnny Nongrum u Snar ia kura ka jylla.
Ha katei ka sngi kyrpang la wan ban ia don bynta da u Bah Hamletson Dohling Working President ka NPP State Meghalaya, u Bah Sosthenes Sohtun MLA ka Jirang uba dei ruh u chief whip ka jylla, Bah Damanbait Lamare MLA ka Umroi, bah Charles Marngar MLA ka Mawhati, Kong Rona Khymdeit MDC Nongpoh, Samla Pyndaplang Wahlang President NPYF Ribhoi lem bad kiwei kiwei ki nongialam ka NPP/NPYF.
Haba kren ha katei ka sngi, u President ka NPYF u Bah Pyndaplang Wahlang u la ong, ba kum ki samla kiba dang don hapdeng ka jingpule ngi dei ban don Ka Mynsiem kaba sngewlem bad ka Mynsiem ban ia kyntiew lang iwei ia iwei, bad u la ong ruh, haba phi la nangkiew haka kam pule puthi kumta nang kiew ruh haka mynsiem ban ia shakri lang ban long ki Nong pynwandur iaka jylla jong ngi bad hakajuh kapor u la kyntu ba hapdeng ki jingiaid lynti haka jingim, ngi dei ban buh ia u Blei ha khmat kiei kiei baroh bad ba ngin long kiba shepting ia u.
Haba ai jingkren ruh ha kane ka sngi naduh u kongsan u Bah Hamlet Dohlieng bad kynthup kitei ki nongmihkhmat na Ri Bhoi, ki la ai ka jingiaroh ia ka NPYF Ri Bhoi, kiba la shim ia kane ka sienjam ban ai burom ia ki samla ba paw ka Ri Bhoi bad kane ka dei ka nuksa babha tam bad kaba long ruh ka jingai mynsiem na ka bynta ki samla jong ka Ri Bhoi ba kin dang don ia kata ka thong ban kiew ha ka ka jingim kam pher la ka dei ha ki jingpule ne ha kino kino ki sap ki phong ba ki don ha ka jingim.
