Nongpoh, Naitung 26: Kiba bun ki nongtrei bar jylla ha LPG Botlling Plany ka Indian Oil Corporation Limited (IOCL) kaba don ha ka Shnong Pyllun, Umiam mynta ka sngi ki la phed krad noh ia lade na ka jaka trei, kaba dei hadien ba ki dkhot ka FKJGP North Khasi Hills Unit ki la leit jurip kynsan ia ka jingpyntreikam, kaba dei hadien ba ki la ioh jingtip ba ki nongtrei bar jylla kiba wan trei ha katei ka jaka kim don satia ia ki kot ki sla kiba paka.
Ha kane ka jingleit jurip la ialam da u General Secretary ka FKJGP North Khasi Hills Unit, u Bah Ricky Majaw bad la synrang lang da ka jingdon lang u Bah Banroy Wahlang Asst. Information Secretary, u Bah Lambha Kurbah President Umiam Circle lem bad kiwei kiwei ki dkhot.
Ha kane ka jingleit khynra ka seng ia ki nongtrei bar jylla, ki bor pyniaid katei ka Bottling Plant ka IOCL la lap ba ym tang ki nongtrei bar jylla kiba la phet krad ia lade na ka daw ka jingbym don ki kot ki sla kum ka Labour License bad kiwei ki kot bad wat katei ka IOCL ruh kam shym la ioh ia ka NOC na ka Shnong Pyllun, hadien ba ka por ba ai ia ka NOC ka la kut.
Ka Seng ha kane ka sngi ka la ai por ka sngi tang hapoh shi taiew ban pynbiang ia ki kot ki sla kynthup ka NOC bad ki Labour License, ha kaba ka seng mynta ka la phah ka sangeh ban trei ia ki kam bad lada ka IOCL kam lah ban pynbiang kum ba la buh por ka seng kan iaid da ka lynti kaba kham tyngeh.
U Bah Anthony Passah kum u Rangbah Shnong ka shnong Pyllun, ha kane ka sngi u la ai ka jingkyrshan ia ka FKJGP kaba la wan ban jurip ia kane ka Botlling Plant ka IOCL ha Umiam bad kum ka shnong ru ka ai ka jingkyrshan ba ki nongtrei bar jylla kim don satia ia kita ki labour license bad ruh wat ia ka IOCL kam shym pat ioh ia ka NOC, namar ka NOC ba la ai da ka shnong ka la kut bad kam shym la pynthymmai biang ia ka NOC.
