Nongpoh, Naitung 30: Ki nongialam ba hakhamt ka RBYF sengkmie mynta ka sngi ki la leit syndon ban ia kynduh ia u Chancellor ka skulbah USTM ban pan syndon ka jingpynshai kaba bniah halor ka thong jong kata ka ‘Mission Educational Rehabilitation’ kaba la pynpaw ha Facebook bad kaba u la delate noh, ba ka skulbah USTM ka thmu ban kdup ia kito ki samla pule kiba la shah kyndang na Assam bad kiba ym don ing don sem shuh halor ka jingkynnoh ba ki shong beain ha ka jylla Assam.
Ha kane ka jingleit kynduh ia u Chancellor ka USTM u Mahbabul Hogue la ialam da u Chief Organizing Secretary ka RBYF u Bah Prang Kylla bad la don lang u Bah Liander Nongshli, Working President, u Bah Bawantippor Marwein, Finance Secretary lem bad kiwei ki dkhot ka seng.
Kum ban pynkynmaw, ka sorkar Assam ka la kyndang naphang ia kito kiba wan sah beaiñ ha Assam bad bun ki samla kiba la shah ktah na kane ka jingkyndang ka sorkar Assam, hynrei kaba pynsgnewlyngngoh ia ka seng ka long ba u Chancellor ka USTM u thmu ban kdup ne ai jaka riehtngen ia kite kiba la shah kyndang naphang kynthup wat ia ka jingpule jongki.
Dei halor kane ka nongrim, ka seng RBYF ka la mih ban pyrshah jur bad ka la leit ban ia kynduh ia u Chancellor ka USTM ban pan jingshai bad ha kane ka jingiakynduh la mih ka jingiania kaba jur ba ka seng ka ieng ha ka nongrim ban pyrshah ba kan nym pdaing ban wan kita ki samla pule ba shah kyndang na Assam, namar na Ri Bhoi bad wat ha ka jylla ruh ki dang don bun ki samla kiba duk ba kyrduh kiba donkam ia ka jingpule.
Haba kren sha ki lad pathai khubor, u Bah Phrangsngi Kylla Chief Organising Secretary ka RBYF, u la ong ba ka seng ka pyrshah jur halor ka jingthoh kaba u Chancellor u la pynrung ha ka rynsan social media lyngba ka Facebook ba ka USTM bad ka ERDF ka thmu ban kdup ia kitei ki samla pule kiba la shah kyndang na ka jylla Assam.
Shuh shuh, u la ong ruh ba ka seng RBYF horkit hordang kan nym pdiang bad lada ka skulbah USTM ka iaid shakhmat ban kdup ia kita ki samla pule ba la shah kyndang na Assam, ka seng kam banse ban iaid da ka lynti kaba tyngeh, ha kaba ka seng ka la kyrpad ruh ia ki nongialam shnong bad ki paidbah ban pyntip lem lada don kum kane ka jingthmu katei ka skulbah USTM, u la bynrap.
